Foto: ult.kz
Inflıasııalyq jaǵdaı týraly Ulttyq ekonomıka vıse-mınıstri Azamat Ámrın baıandama jasady. Vıse-mınıstrdiń málimetinshe, 2025 jylǵy shildede Qazaqstanda jyldyq ınflıasııa 11,8 paıyz deńgeıinde saqtalǵan. Jyldyq azyq-túlik ınflıasııasy 11,2 paıyzdy qurady. Taýarlar men qyzmetterdiń aılyq baǵasynyń ósý qarqyny 0,8 paıyzǵa jetip, maýsym aıymen salystyrǵanda 0,1 paıyzǵa tómendegen. Aqyly qyzmetter ósimi 14,9 paıyzdy quraǵanmen, aldyńǵy aımen salystyrǵanda 1,2 paıyzdyq tarmaqqa tómendegen.
Jıynda áleýmettik mańyzy bar azyq-túlik ónimderi naryǵyndaǵy jaǵdaı týraly Saýda jáne ıntegrasııa birinshi vıse-mınıstri Aıjan Bıjanova baıandady. Onyń dereginshe, shilde aıynda osy segmenttegi aptalyq ortasha baǵa dınamıkasy 0,1 paıyzdan tómen deńgeıde bolyp, ónimderdiń basym bóliginiń baǵasy turaqtanǵan. Bir aı ishinde: sábiz 9,1 paıyzǵa, kartop 7,9 paıyzǵa, pııaz 1,8 paıyzǵa, kúrish 0,6 paıyzǵa, jumyrtqa 0,1 paıyzǵa arzandaǵan. Al nan, makaron jáne sút ónimderiniń baǵasy turaqty bolǵan.
Keı ónimder qymbattaǵan: qyryqqabat baǵasy bir aıda 12,3 paıyzǵa óskenimen, shildeniń sońǵy aptasynda baǵa tómendegen. Taýyq eti 2,6 paıyzǵa qymbattaǵan. Sıyr etiniń baǵa ósimi báseńdep, 1,4 paıyzdy quraǵan.
Kúnbaǵys maıy naryǵyn retteý maqsatynda Maıly daqyldar óńdeýshileriniń Ulttyq assosıasııasymen kelisim jasalǵan. Aýyl sharýashylyǵy mınıstrligi men Saýda jáne ıntegrasııa mınıstrliginiń qatysýymen ótken kelissózder qorytyndysynda halyqqa qoljetimdi baǵada ónimdi satý jónindegi úshjaqty memorandýmǵa qol qoıyldy.
«Araltuz» kompanııasymen birlesip, ónim baǵalaryn kezeń-kezeńmen tómendetý týraly aldyn ala kelisimge qol jetkizildi. Qajetti sharalardy jyl sońyna deıin júzege asyrý josparlanyp otyr.
Aımaqtaǵy jaǵdaılarǵa toqtala kele Aıjan Bıjanova Astana, Almaty, Túrkistan jáne Almaty oblystarynda baǵanyń ósý qarqynynyń báseńdegenin atap ótti. Bul óńirler jalpy ulttyq kórsetkishtiń turaqtalýyna yqpal etken.
Sıyr etiniń baǵasyn uzaq merzimdi turaqtandyrý maqsatynda Aýyl sharýashylyǵy mınıstrligi keshendi sharalar qabyldap jatqanyn habarlady. Iri qara mal basy men usaq maldy kásibı jemdeýge mamandanǵan kásiporyndarǵa aınalym qarajatyn tolyqtyrý baǵdarlamasy iske qosylǵan. Asyl tuqymdy analyq mal basyn satyp alý úshin jyldyq 5 paıyzdyq mólsherlemede jeńildetilgen nesıe mehanızmi ázirlendi. Sonymen qatar, óńdeýshi kásiporyndarǵa satylǵan ár kılogramm sıyr eti úshin 175 teńge mólsherinde sýbsıdııa beriledi. Budan bólek, kúrish pen qaraqumyq baǵalaryn turaqtandyrý úshin «Prodkorporasııa» óndirýshiler men óńdeýshiler arasynda osy ónimderdiń qoryn qalyptastyrý týraly úshjaqty memorandýmǵa qol qoıǵan.
Jıyndy qorytyndylaı kele Serik Jumangarın egin jınaý maýsymynda kókónis ónimderiniń baǵasyn turaqtandyrý maqsatynda óńirlerde aýyl sharýashylyq jármeńkelerin belsendi ótkizýdi, ishki naryqtaǵy usynysty arttyryp, baǵany tómendetý úshin Qyrǵyzstan, О́zbekstan jáne Túrikmenstan shekaralarynda kókónis-jemis ónimderine arnalǵan «jasyl dáliz» uıymdastyrýdy tapsyrdy.
