Foto: babok-school.ru
Mınıstrdiń aıtýynsha, joba – óndiristen bastap túpki tutynýshyǵa deıingi aralyqtaǵy barlyq kezeńdi elektrondy formatta baqylaýǵa múmkindik beretin tolyqqandy ekojúıe. Iаǵnı, kez kelgen taýardyń qaıda óndirilgeni, qalaı tasymaldanǵany, qaı jerde satylǵany týraly aqparat ashyq ári naqty tirkelip otyrady. Bul júıe kóleńkeli ekonomıkamen kúreste jáne ádil básekelestik ornatýda mańyzdy quralǵa aınalmaq.
Sıfrlyq baqylaý júıesiniń negizi – taýarlardyń tolyq klassıfıkasııasy men katalogtalýy. Búginde 1,3 mıllıonnan astam ónimge jikteý jumystary júrgizildi. Sonymen qatar, «Ulttyq taýarlar katalogy» men «Elektrondyq taýarlar katalogyna» sáıkes jumystar aıaqtalýǵa jaqyn.
Jobanyń taǵy bir mańyzdy elementi – taýarlardy sertıfıkattaý prosesin sıfrlandyrý. Osy maqsatta ótken jyly «Tehnıkalyq retteýdiń aqparattyq júıesi» (E-KTRM) iske qosylǵan bolatyn. Qazir bul júıede 100 myńnan astam ótinish berýshi, 1,5 myń akkredıttelgen uıym tirkelgen. Nátıjesinde, 3,5 mıllıonnan astam ruqsat qujattary sıfrlyq túrde berilip, sertıfıkattaý úderisi edáýir jeńildegen ári ashyqtyq qamtamasyz etilgen.
Bul bastamalar el ishinde zańdy saýda aınalymyn keńeıtýmen qatar, otandyq óndirýshilerdiń ónimin syrtqy naryqqa senimdi usynýǵa múmkindik bermek. Sarapshylardyń pikirinshe, sıfrlyq baqylaý tetikteri ınflıasııany tejeýge, deldaldyq tizbekterdi qysqartýǵa jáne tutynýshyǵa taýardy naqty baǵamen jetkizýge jol ashady.
Osylaısha, «Saýdanyń sıfrlyq aınasy» jobasy el ekonomıkasyn sıfrlyq formatqa kóshirýdegi kezekti naqty qadam bolyp otyr.
