Foto: astana-akshamy.kz
Erjigit Balqybekovtyń aıtýynsha, usynylyp otyrǵan tetiktiń negizgi qaǵıdaty – aınalym qarajatyn 0,01%-ben tolyqtyrý úshin kásipkerlik sýbektilerge qaıtarymdy kredıtter berý. Onyń ornyna saýda jelileri taýarlardy naryqtyq baǵadan tómen balamaly baǵamen tek AÁK alýshylar úshin bosatýǵa mindettenedi.
Pılottyq iske qosý Aqkól qalasynda ótti. Qyrkúıek aıynyń sońyna deıin osyndaı júıe Kókshetaý men Pavlodarda iske qosylady. Joba sátti bolǵan jaǵdaıda AÁK alýshylar sany 245 myń adamnan asatyn búkil el boıynsha keńeıtiletin bolady.
Joba «eGov Mobile» elektrondyq úkimet portaly aıasynda iske qosylǵan jeke servıs – «Áleýmettik ámııan» aqparattyq júıesi arqyly júzege asyrylyp jatyr. Pılottyq joba aıasynda vaýcher somasyn anyqtaýda bir aılyq eseptik kórsetkish (AEK – 3 932 teńge) árbir otbasy múshesine qoldanylady. Mysaly, eger AÁK alýshy otbasynda 4 adam bolsa, vaýcher somasy shamamen 16 myń teńge bolady. Bul soma jeńildik kórsetkishi retinde paıdalanylady – tikeleı aqshalaı kómek emes, tek jeńildik alý úshin jaramdy.
Úkimettiń baspasóz qyzmetiniń habarlaýynsha alýshylardyń tizimi «Otbasynyń sıfrlyq kartasy» júıesi arqyly qalyptastyrylady jáne «Áleýmettik ámııanǵa» beriledi. AÁK alýshylar dúkenniń kassasynda QR – kodty usynady, onda olarǵa áleýmettik mańyzy bar-nan, jarma, kókónis, et jáne sút ónimderiniń tizbesinen taýarlarǵa jeńildik beriledi. Naryqtyq jáne jeńildikti baǵa arasyndaǵy aıyrmashylyq vaýcherden alynady, al qalǵan somany satyp alýshy tóleıdi.
Joba turaqtandyrý qory esebinen qarjylandyrylady. 35 mlrd teńge saýda jelilerin jeńildikpen kredıtteýge, al 65 mlrd teńge – otandyq fermerler men óndirýshilerden ónimdi forvardtyq satyp alýǵa baǵyttalady dep josparlanyp otyr. AÁK alýshylar úshin jeńildiktiń jalpy mólsheri saýda ústemesinen bas tartý jáne tómendetilgen baǵamen satyp alý esebinen 25%-ǵa jetýi múmkin.
