Memlekettik kirister komıtetiniń Aýdıt departamenti Bereshekpen jumys basqarmasynyń basshysy Qaısar Arynnyń túsindirýinshe, kásipker aldymen salyq organyna ózine qandaı kompanııa qansha qaryz ekenin kórsete otyryp ótinish beredi. Sonyń negizinde salyq organdary debıtorǵa resmı habarlama joldaıdy.
«Mysalǵa, sizge bir kompanııa 200 myń teńge qaryz delik. Al sizdiń salyq bereshegińiz 150 myń teńge bolsa, biz tek sol 150 myń teńgeni óndirýge habarlama jibere alamyz. Odan asyrýǵa quqyǵymyz joq», dedi Qaısar Aryn.
Habarlama alǵan debıtor 20 kún ishinde bereshek somasyn naqtylap, ózara esep aıyrysý aktisin jasap salyq organyna usynýy tıis. Eger bul merzimde eshqandaı jaýap bolmasa, salyq organy tekserý júrgizýge quqyly. Qaryz naqty anyqtalǵan jaǵdaıda, debıtor kompanııadan óndiriledi jáne kásipkerdiń salyq bereshegi sonyń esebinen jabylady.
2026 jyldan bastap jańa Salyq kodeksine saı, eger debıtor eshqandaı jaýap qaıtarmasa, salyq organdary oǵan aıyppul salyp, esepshotyn buǵattaı alady.
«Bul kásipkerlerdiń óz qaryzyn óndirip alýyna jaqsy múmkindik. О́ıtkeni ózine qaryz kompanııa boryshty tólemeı júrse, aqshany óndirip alý úshin sotqa júginýine týra keledi. Al sot úderisi 2 aıdan bir jylǵa deıin sozylýy múmkin. Al myna jerde naqty qujattarmen dáleldense, 20 kún ishinde óziniń salyq qaryzyn jaýyp alýyna bolady», dep túsindirdi Qaısar Baqytuly.
Jańa Salyq kodeksi 2026 jyldyń 1 qańtarynan bastap kúshine enedi.
