Foto: pixabay.com
Mınıstrlik málimetinshe, Qazaqstanda qant dıabeti dıagnozy qoıylǵan dıspanserlik esepte 535 myńnan astam adam, onyń ishinde 5 625 bala tur. Búginde olardyń barlyǵy tegin dári-dármekpen qamtylǵan.
Memleket qant dıabeti dıagnozy qoıylǵan ár naýqasqa jaǵdaıdyń aýyrlyǵyna baılanysty jylyna 618 teńgeden 6,5 mln teńgege deıin jumsaıdy.
«Barlyq muqtaj adamdardy qamtamasyz etý jáne ósip kele jatqan qajettilikterdi jabý úshin kelesi jyldyń qańtar aıynan bastap qant dıabeti kezinde dári-dármekpen qamtamasyz etý MÁMS júıesi arqyly júzege asyrylady. Bul turaqty jáne ýaqytyly qarjylandyrýdy qamtamasyz etýge múmkindik beredi. Qant dıabetimen aýyratyn pasıentterdiń 96%-y MÁMS júıesimen qamtylǵan. Balalarǵa, zeınetkerlerge, júkti áıelderge, múgedektigi bar adamdarǵa jáne basqa da osal toptarǵa memleket saqtandyrý tóleıdi», delingen mınıstrlik habarlamasynda.
Sondaı-aq, Densaýlyq saqtaý mınıstrligi qant dıabetin emdeýge arnalǵan dári-dármekter tizbesin jańartty. Endi tıimdiligi dáleldengen preparattar ǵana qalady. Jańa býyn ınsýlıni — deglýdekke qoljetimdilik keńeıip keledi, ol qazir pasıentterdiń barlyq sanatyna, sonyń ishinde júkti áıelder men balalarǵa da qoljetimdi bolady.
Osylaısha, Qant dıabeti myńdaǵan qazaqstandyqtardyń ómirine áser etetin aýrýlardyń biri retinde árdaıym memlekettiń erekshe baqylaýynda qalady.
