foto: gov.kz
Ázerbaıjandyq delegasııa Alakól jaǵalaýynda halyqaralyq emdeý-saýyqtyrý keshenin salý jónindegi ınvestısııalyq jobany tanystyrdy.
Investorlar jyl boıy jumys isteıtin, bir mezette 800 adamǵa deıin qabyldaı alatyn týrıstik nysan salýdy josparlap otyr. Jobanyń ınvestısııa kólemi – 20 mıllıon AQSh dollary. Keshen paıdalanýǵa berilgennen keıin shamamen 200 jańa jumys orny ashylady. Budan bólek, bul joba óńirdiń týrıstik tartymdylyǵyn arttyryp, jergilikti bıýdjetke túsetin salyq túsimderin kóbeıtýge jáne medısına men demalys toǵysynda jańa klaster qalyptastyrýǵa múmkindik beredi.
«2024 jyly Qazaqstan men Ázerbaıjannyń birlesken ınvestısııalyq qory quryldy. Eger Alakóldegi joba júzege assa, ol osy qor aıasyndaǵy alǵashqy jobalardyń biri bolmaq», dedi Alım Baıel.
Oblys ákimi bul týrıstik jobanyń óńir úshin mańyzdylyǵyn atap ótti.
«Qazir Alakól týrıstik aımaǵynyń bas jospary ázirlenip jatyr. Qurylysqa jer telimin berýge daıynbyz. Ákimdik qajetti qoldaýdy kórsetedi», dep málimdedi Berik Ýálı.
