Osy saparda Sýretshiler odaǵynyń múshesi, Kórkemsýret akademııasynyń múshe korrespondenti, tanymal músinshi Erǵalı Bekeshev teńiz jaǵasyndaǵy qalaǵa bıiktigi 3 metr, eni 2 metrge jýyqtaıtyn qobyz músinin jasap aparyp, Mańǵystaý jurtyna syıǵa tartypty.
– О́ner jolynda júrgen soń óz halqymyzdyń salt-dástúrin, bolmysyn beıneleıtin dúnıelerdi jasaǵandy unatamyn. О́zim negizinen tot baspaıtyn metalmen jumys isteımin. Buǵan deıin de qobyz aspaby birneshe shyǵarmama ózek bolǵan edi. Osy jumysyma – «Aqnar» dep at qoıdym. Jalpy qobyz – tek qazaqtyń emes, adamzattyń kóne aspaptarynyń biri. Daýysy erekshe, tylsymǵa toly. Atyraýda Aqnar Táttibaıqyzy esimdi qobyzshy Reseıdiń Altaı ólkesine baryp, qobyz tartqanda, kúıge balqyǵan halyqtyń kózine jas alǵanyn aıtyp edi. Shynymen de qobyzdyń aınalasynda mıstıkalyq oqıǵa kóp. Qobyzyn báıgege qosatyn Qoılybaı baqsynyń áńgimesi nege turady? – deıdi Erǵalı Orynǵalıuly.
Erǵalı Bekeshev bıyl jazda Londonǵa, «Golden Time Talent» atty halyqaralyq óner festıvaline de qatysty. Festıvaldyń onlaın kezeńinde «Aldar kóse» atty músinimen birinshi oryndy ıelenip, Londonǵa shaqyrtý alǵan sheber temir men tabıǵı tastan jasalǵan «Tabandylyq» atty jumysymen halyqaralyq festıvaldyń jeti júldesiniń birin alyp qaıtqan edi.
Budan bólek Erǵalı Bekeshev – Astana qalasyndaǵy «Astananyń qurdasy», Oral qalasyndaǵy «Arman qusy», «Náziktik», «Dombyra», Aqtóbedegi «Naryn», Aqsaı qalasyndaǵy «Sýretshiniń álemi» syndy músinderdiń avtory. Sýretshiniń taǵy bir jumysy – «Han taǵy» Oral qalasyndaǵy Han toǵaıyna ornatylmaq bolyp jasalǵan edi. Biraq túrli kedergilerdiń kesirinen áli ornyn tappaı tur.
Batys Qazaqstan oblysy
