Kóleńke basy uzaryp, kesh túse Semeı jurty Abaı teatryna qaraı aǵyldy. Biz de osy nópirmen birge kórermen zalyna lap qoıdyq. Ishte ıne shanshar jer joq, oryn jetpegen jurtqa tik turyp konsert kórýge týra keldi. Kenet burynnan tanys, tanys ta bolsa bólek bir áýen syńǵyrlap qoıa berdi. Abaı eliniń úsh ishekti dombyra áýezi. «Kózimniń qarasy» kúı bolyp tógildi. Shertip otyrǵan kúıshi, óner zertteýshi – Rústem Núrkenov. Dáýlesker kúıshi Talasbek Ásemqulovtyń qolynan kúı úırengen, osy Shubartaýdyń týmasy. Al kesh shymyldyǵy ashylǵanda sahna emes, Abaı ómir súrgen sazdy, saýyqty bir keshtiń ústinen túskendeı, kóńilge túrli oı saldy. «Jelsiz túnde jaryq aı» áni sybyzǵy tilinde, kóne bir dáýirdiń únindeı syzyldy. Iаpyr-aı, bul ne qudiret dep tamsanyp úlgerdik. Sahna shymyldyǵy tolyq ashylǵanda: «Qazaqtyń qasıetin taný – Abaıdy tanýdan bastalmaq. Halqymyzdyń sóz ónerin zerdeleý – Abaı taǵylymyn baǵamdaýdan baıqalmaq. Abaı – qazaq tarıhyndaǵy qaıtalanbas som tulǵa. Abaı bıigi – halqymyzdyń kórkemdik oı-tanymynda eshkim jetpegen zańǵar» degen jazýshy Muhtar Maǵaýınniń sózi ekranda kórinis berdi. Budan soń ónerpazdar birinen soń biri sahna tórindegi qazaqy úıdiń keregesin jaǵalaı jaıǵasyp, Abaıdyń sıqyrly mýzyka álemine kórermen kópshilikti eriksiz baýrap ala jóneldi.
Ánshi Perızat Turarova «Jelsiz túnde jaryq aıdy», sybyzǵyshy Talǵat Muqyshev «Ertis tolqyny» halyq kúıin, Tolǵanbaı Sembaev «Qor boldy janymdy», Gúldana Noǵaıbaeva «Tatıananyń ánin» oryndady. Kórermen qulaq kúıi ábden kelip, kóńil bir ásem kúıge ornyqqan kezde kesh tizginin ustaǵan radıo jýrnalısi, ánshi Jasulan Bazarbekov ejelden eli aralas, qoıy qoralas Ertis-Baıan óńirinen kelgen belgili ánshi Erbol Aıtbaevtan qonaqkáde suraǵan.
Ánshi Erbol Hamıtuly – Estaı Berkimbaıuly, Jaıaý Musa, Mustafa Búrkitbaıuly, Qalı Baıjanov, Baıǵabyl Jylqybaev syndy áıgili ánshilerdiń dástúrin jalǵaǵan arýaqty ónerpaz. Aqqól-Jaıylmadan kelgen qonaqjaı kelmegen eken, Abaı toıyna «Qarańǵy túnde taý qalǵyp» ániniń kópten aıtylmaı ketken Qalı Baıjanovtan jetken nusqasyn oryndaǵan. Ánshi E.Aıtbaevtyń aıtýynsha, Qalı Baıjanov Abaı aýylynda bir apta jatyp, Abaı ánin óz aýzynan úırengen eken.
Kórermen yqylasyna bólengen E.Aıtbaev budan soń Zilqaranyń «Jıyrma bes» ánin oryndady.
Kesh kórigin Klara Tólenbaeva qyzdyrdy. Kórermen sahnadan túsirgisi kelmeı, qaıta-qaıta án surady. Sol sekildi Gúlmıra Sarınany da Semeı jurty saǵynǵany kórinip turdy. Erkin de erkin samǵatqysy kelgen el qoshemetke bóledi. Al Alataýdyń ánin áýelete kelgen Erbolat Shaldybekov Jambyl jyrymen kesh alaýyn jandyra tústi. Abaı atamyzdan qaldy deıtin kúı murasyn Rústem Núrkenov pen Daryn Qudaıbergen kúmbirletti. Al Erlan Rysqalı baıaǵynyń sal-serilerindeı oınaqy áýenderdi quıqyljyta oryndap, tyńdarman delebesin qozdyrdy. Keshtiń qurmetti meımany belgili ánshi, halyq ártisi Ramazan Stamǵazıev Birjan sal ánderin oryndap, keshti joǵary deńgeıge kóterdi.
Jalpy, keshte Ramazan Stamǵazıev, Tolǵanbaı Sembaev, Erbol Aıtbaev, Erkin Shúkiman, Talǵat Muqyshev, Klara Tólenbaeva, Gúlmıra Sarına, Berik Omarov, Erlan Rysqalı, Erbolat Shaldybekov, Perızat Turarova, Talǵat Abýǵazy, Tóleýtaı Serikov, Gúldana Noǵaıbaeva, Rústem Núrkenov, Daryn Qudaıbergen, Jasulan Tájıev, Dıas Murathan, Darııa Bekpenbetova, Aıdos Sanııazbek, Birjan Aıtahmetov, Aıdan Baýyrjanuly, Tańat Muqashev syndy ónerpazdar óner kórsetti. Birer meımandardy aıtpaǵanda, bári de Abaı eliniń týmalary. Al osynaý keremet keshtiń bas rejısseri – Juldyzbek Jumanbaı ekenin de aıta ketken jón.
Bul konserttiń negizgi jańalyǵy – Tolǵanbaı Sembaev «Qor boldy janym», Erkin Shúkiman «Men kórdim uzyn qaıyń qulaǵanyn» ánderin qaıta jańǵyrtyp, úlken sahnaǵa alyp shyqqany der edik.
Keshte Abaı, Birjan sal, Shákárim, Ýáıs, Muhametjan Maıbasaruly, Aqylbaı Abaıuly, Maıra Ýálıqyzy, Jánibek Kármenovtiń ánderi oryndaldy. Dástúrli óner degen kıeli mura ekenin osy kesh dáleldegendeı boldy. Bul keshtiń mundaı joǵary deńgeıde ótýiniń ózindik sebebi de bar ekeni ras. Onyń syry – buǵan deıin qalyptasqan dástúrinde jatsa kerek. Abaı eliniń án óneri Álmaǵambet Qapsalıamuly, Muhametjan Maıbasaruly, Ámire Qashaýbaev, Mádenıet Eshekeev, Tursynǵazy Rahımov, Jánibek Kármenov, Bolat Sybanov, Sanaq Ábeýov, Keldenbaı О́lmesekov jáne t.b. ánshiler arqyly dástúrli ónerdiń murty buzylmaı, sheti sógilmeı búgingi urpaqqa jetip otyr.
Abaı oblysy
