– Bıylǵy bilim báıgesinde baq synap, jaýapty mejeni eńsergenderińizge qýanyshtymyn! 77 myńnan astam talapker grant ıegeri atandy. Bul – qajyrly eńbek pen bilimge degen talpynystyń nátıjesi. Al grantqa ilige almaǵandar úshin bul – úmittiń úzilýi emes. Grant – tek bir múmkindik. Al tabandylyq pen maqsatqa adaldyq – jetistikke bastar basty kúsh, – dedi mınıstr.
Onyń aıtýynsha, bıylǵy konkýrsqa ótken jylmen salystyrǵanda 9 myń talapker artyq ótinish bergen. Osyǵan baılanysty básekelestik te joǵary boldy. Degenmen, memlekettik granttan bólek, basqa da qoljetimdi bilim berý múmkindikteri bar.
Mınıstr atap ótken balama múmkindikter:
Ýnıversıtetishilik rektor granttary. Bul granttar oqý úlgerimi jaqsy, belsendi ári áleýmettik jaǵdaıy eskerilgen talapkerlerge joǵary oqý oryndary tarapynan usynylady. Máselen, «Týran-Astana» ýnıversıteti UBT-da 100 baldan joǵary jınaǵan «Altyn belgi» ıegerlerine 4 jyldyq rektorlyq granttar beredi. Halyqaralyq týrızm jáne meımandostyq ýnıversıteti 680 maqsatty grant bólgen.
Jergilikti ákimdik granttary. Áleýmettik osal toptarǵa jáne suranysqa ıe mamandyqtarǵa oqytý úshin ákimdikter bóletin granttar. 2025 jyly jergilikti atqarýshy organdar 1 700-den astam grant bóldi.
Jumys berýshilerdiń arnaıy granttary. Joǵary oqý oryndary men jumys berýshiler arasyndaǵy kelisim negizinde bólinedi jáne túlekterdi jumyspen qamtýǵa baǵyttalǵan.
Jeke demeýshiler men qorlardyń granttary.
- «Qazaqstan halqyna» qory – 500 grant;
- «KAZENERGY» qaýymdastyǵy – Soltústik Kaspıı jáne Qarashyǵanaq jobalary esebinen granttar;
- «Qazatomónerkásip» UAK – aýyldyq jastarǵa arnalǵan «Murager» baǵdarlamasy arqyly granttar usynady.
Bos granttar men aýysý múmkindigi. Keıbir talapkerler granttan bas tartqan jaǵdaıda, kelesi joǵary ball jınaǵan úmitkerge múmkindik beriledi.
Sondaı-aq, aqyly bólimde oqýdy bastap, keıin jaqsy oqý úlgerimimen bos grantqa aýysýǵa bolady.
– Eń bastysy – maqsattan taımaý, múmkindikterdi zerttep, áreket etý. Armanyń – bolashaǵyń. Sol bolashaq jolynda qoldaý men múmkindik árdaıym tabylady, – dedi Saıasat Nurbek.
