Jıynǵa Astana qalasynan Qazaqstan onomastar odaǵynyń basqarma tóraǵasy, respýblıkalyq onomastıkalyq komıssııa múshesi Gúlnár Bekenova men joba múshesi, geograf-maman, PhD doktor Nurlybek Zınabdın arnaıy keldi. Batys Qazaqstan oblystyq mádenıet, tilderdi damytý jáne arhıv isi basqarmasy uıymdastyrǵan dóńgelek ústel otyrysyna óńirdegi ǵalymdar, ólketanýshylar, kónekóz qarııalar men tilshiler de qatysty.
Gúlnár Shıapqyzy óz sózinde «Batys belesinde – babalar úni» atty tarıhı-tanymdyq ekspedısııanyń barysyn baıandap, ejelgi jer-sý ataýlaryn qalpyna keltirý jólyndaǵy ádis-tásilder týraly aıtty. Mádenıet jáne aqparat mınıstrliginiń tapsyrysy boıynsha 4-10 tamyz aralyǵynda oblys aýmaǵynda júrgizilip jatqan joba onomastıkalyq ataýlardy retke keltirýdiń negizgi ǵylymı dáıekterin basshylyqqa ala otyryp, eldi meken ataýlaryna qatysty tarıhı derekterdi ǵylymı aınalymǵa túsirý jáne tarıhı onomastıkalyq ataýlardy qalypqa keltirý, júıelendirý maqsatyn kózdep otyr eken.
BQO mádenıet, tilderdi damytý jáne arhıv isi basqarmasynyń bólim basshysy Svetlana Qadyrbaıqyzy óńirdegi jaǵdaı týraly aıta kelip, táýelsizdik alǵaly beri oblysta ıdeologııalyq turǵydan eskirgen nemese mán-maǵynasyn joǵaltqan 5 aýdannyń, 109 eldi mekenniń, 1854 kósheniń ataýlary ózgertilgenin baıandady. Búginde Batys Qazaqstan oblysynda 12 aýdan, 454 eldi meken, 4077 kóshe bar. Onyń ishinde ıdeologııalyq turǵydan eskirgen áli de bolsa 2 kent, 22 aýyldyq okrýg, 545 kóshe, 64 eldi meken ataýlary ózgertýdi qajet etedi eken.
Jıyn óte qyzyqty ótti. Qordalanǵan máseleler talqylanyp, jer-sý ataýlarynyń shyǵý tarıhy týraly ózekti oı qozǵalyp, qundy usynys, keleli pikirler aıtyldy. Fılologııa ǵylymdarynyń doktory Murat Sabyr men Ǵabıt Hasanov, tarıh ǵylymdarynyń kandıdaty Álfııa Baıbolsynova, ólketanýshy Zulqoja Sharafýtdın, Dáýletkereı Qusaıynov, Nurlan Sádir, Ahmedııar Batyrhanov t.b. óz sózinde el men jer tarıhyn túgendeýde toponımıkalyq ataýlardyń mańyzdy ekenin aıtty. Respýblıkada bastalǵan úlken iske jan-jaqty qoldaý bildirýge ýáde berdi.
Batys Qazaqstan oblysy
