KО́KShETAÝ. 17 aqpan. Aqmola oblysynyń ákimi Sergeı Kýlagın Atbasar qalasyndaǵy sý tasqynynan zardap shekken turǵyndardy jańa qonystarymen quttyqtady. Bul týraly egemen.kz tilshisi habarlady.
Zamanalyq sáýlettegi jáne barlyq qolaılylyqtar qarastyrylǵan kópqabatty 45 páterlik úıdiń kiltterin tapsyrý umytylmas áserdegi saltanatqa aınaldy. Osyndaǵy barlyq 45 páterde mol dastarhan jaıylyp, izgi tilekter aıtyldy. Ásirese, ákimdi sýretke túsýge súırelegen balalardyń qýanyshynda shek joq.
Biz 2 bólmeli páterdiń kiltine ıe bolǵan jas ana Gúlnár Tósenovanyń bosaǵasyna qutty bolsyn aıttyq.
Gúlnárdiń otbasy ózen jıegine jaqyn ári samannan turǵyzylǵan úıdi uzaq jyldar qonys etken. Kútpegen apattan zamatta zardap shekkender de solar bolypty. Alǵashynda jataqhananyń uıadaı bólmesinen ýaqytsha oryn tıgende kádimgideı qýanǵan. Mine, búgin jarqyraǵan jańa páterge qoly jetip, balalarymen birge máre-sáre bolýda.
«Men úı-ishimniń atynan, basymyzǵa kún týǵan sátte jyly sózin aıamaǵan jerlesterime, kómek qolyn sozǵan jergilikti bılik ókilderine alǵysymdy aıtamyn, – deıdi Gúlnar Tósenova, – Tipti, Elbasynyń ózi jaǵdaıymyzdy qadaǵalap, Úkimet basshysynyń birinshi orynbasary Baqytjan Saǵyntaev bastaǵyn arnaıy komıssııany jiberýi, ózimizdiń oblys ákimi Sergeı Vıtalevıchtiń kún qurǵatpaı bizden habar alyp turǵany memleketimizdiń qoǵam múshelerine degen qamqorlyǵynyń sheksizdigin bildiredi. Men osyndaı Otanymnyń barlyǵyna masattanamyn. Balalarym da osy eldiń bir tutqasy bolsa eken dep armandaımyn».
Atbasar qalasynda, kóktemgi sý tasqyny kezinde 559 apat zardabyn shekken bolatyn. Onyń ishinde 208 úı avarııalyq jaǵdaıda dep tanylyp, al 350-ine kúrdeli jóndeý qajet dep sheshilgenin eske sala ketkimiz keledi. Tótenshe jaǵdaıdy joıý boıynsha is-sharalardyń nátıjesinde úısiz qalǵan 208 otbasy baspanaly boldy. Bul úshin árqaısysy 45 páterlik tórt úı salynyp, burynǵy jataqhana ǵımaraty 29 páterlik turǵyn jaı retinde qaıta qurastyrylýdan ótti.
Qalada sondaı-aq, jartylaı sý astynda qalǵan №1 orta mektep pen 350 úıge kúrdeli jóndeý jumystary júrgizilip, uzyndyǵy 21,4 shaqyrym kóshe qalpyna keltirildi. Sóıtip, Atbasardaǵy tótenshe jaǵdaı zardaptaryn joıý jónindegi jumys josparyna engizilgen barlyq sharalar tolyq kólemde oryndaldy.
Baqbergen Amalbek.
Derek, sýret: egemen.kz.
