Uzaq jyldar boıy jemisti jumys istep kele jatqan kompanııa ondaǵan jyl bederinde oblys aýmaǵynda kóptegen iri áleýmettik nysandardyń jáne turǵyn úılerdiń qurylysyn júrgizdi. Jetekshi ujymnyń jemisti eńbeginiń arqasynda ondaǵan bilim ordasy, balabaqsha, aýrýhana, gıdrotehnıkalyq qurylǵylar men júzdegen kóppáterli turǵyn úı boı kóterip, paıdalanýǵa berildi.
Seriktestik basshysy Serik Oljabekovtiń aıtýynsha, kompanııa qyzmetkerleri qurylysta sapaǵa basa mán beredi. Sonymen qatar, salynatyn nysanǵa qajetti materıaldardyń basym bóligin ózderinde shyǵarýǵa den qoıǵan.
«Biz úshin jobalyq-smetalyq qujatty ózimizde jasaýdyń mańyzy zor. Budan bólek, nysandarǵa kerek materıaldyń 80 paıyzyn kásiporynda shyǵarý, materıaldyq-tehnıkalyq bazamyzdy nyǵaıtý, óz isiniń bilgirine aınalatyn bilikti mamandardy daıarlaý jáne óndiriske qajetti ozyq tehnologııalardy engizý nátıjesinde aýyz toltyryp aıtarlyqtaı nátıjege qol jetkizip otyrmyz», deıdi seriktestik basshysy S.Oljabekov.
Qurylysta sapaǵa mán bergenniń utylmaıtyny anyq. Rasynda kópqabatty turǵyn úılerdi qyzyl kirpishpen, qum jáne gazoblokpen soǵýdyń ózindik mashaqaty kóp. Qol kúshin jáne uzaq ýaqytty talap etedi. Damýdyń dańǵyl jolyna túsken elderde júz qabattan asatyn nysandar boı kóterip jatqany málim. Álgindeı záýlim ǵımarattarǵa negizinen metall karkastar jáne iri qabyrǵalyq panelder qoldanylady. Turǵyn úı salýda ozyq tehnologııaǵa basymdyq bergen bınomdyqtar da osy tásildi tańdaǵan.
Irgeli kásiporyn údemeli ındýstrııalyq-ınnovasııalyq damý baǵdarlamasy aıasynda temirbeton óndiretin zaýytynda iri qabyrǵalyq panel jasaıtyn ınvestısııalyq jobany júzege asyrǵan edi. Búginde kásiporyn jylyna 60000 tekshe metr temirbeton buıymdaryn óndirýge qaýqarly. Munyń ózi olarǵa jylyna 60 páterlik 30 turǵyn úıdi el ıgiligine usynýǵa múmkindik beredi.
Ýaqyt suranysyna saı óndiriletin iri panelderdiń basqa materıaldarǵa qaraǵanda artyqshylyǵy kóp ekenin mamandar da aıtyp júr. Panel – jeńil, jazda – ystyq, qysta sýyq ótkizbeıdi. Ol – tegis ári jyltyr bolǵandyqtan juqa sylaq júrgiziledi. Shilińgir shildeniń aptap ystyǵy da, úskirik aıaz da jyl on eki aı jumys isteýge kedergi keltire almaıdy.
Iri paneldi nysandarda jumystyń 80 paıyzy tehnıka kúshimen atqarylady. Seriktestikte oǵan qajetti qýatty munaralyq krandar men olardy qurastyratyn mamandar jetkilikti. Búginde «Bınomda» júzden astam birlik tehnıka bar, onyń 70 paıyzdan astamy jańa eken. Jańa tehnologııamen salynǵan ǵımarattar jer silkinisine de tózimdi.
Seriktestiktegi tehnıka men qural-jabdyqtardyń 10 paıyzdan astamy jyl saıyn jańartylyp turady. Jumysqa jańadan qabyldanǵan jastardy óz qarjysy esebinen biliktilikti jetildirý kýrstarynda oqytady. Sonyń nátıjesinde maman tapshylyǵyn sezinip otyrǵan joq. Qazir munda 500-den astam adam jumys isteıdi. Ortasha aılyq jalaqy – 250 myń teńge. Qazir kásiporynǵa tapsyrys kóp tússe, jylyna 10 mıllıard teńgeniń qurylys-qurastyrý jumysyn ıgere alatyn áleýeti bar eken.
«Qandaı nysannyń bolsyn, qurylysynyń sapasyna aıryqsha mán bergen jón. О́ıtkeni, qurylys – ekonomıka lokomotıvi. Bul sala keri ketse, elimiz órkendemeıdi. О́kinishke qaraı, munda da shuǵyl sheshimin kútip turǵan problemalar az emes. Qymbatshylyq jan-jaqtan qysyp barady. Naryqta materıaldardyń baǵasy aı emes, apta saıyn ósip jatyr. Sondyqtan da memlekettik satyp alý konkýrstaryna usynylatyn nysandardyń jobalyq-smetalyq qujattaryndaǵy qurylys materıaldarynyń baǵasyna jyl saıyn túzetýler engizip turý kerek.
Bul másele eskerilmese, merdigerler qaryzdan kóz ashpaıdy. Bul usynysymyzdy quzyrly organdarǵa úzdiksiz aıtyp, talap qoıyp kelemiz. «Bınom» tenderde utyp alǵan nysandardyń qujattaryn qaıta qarap, turaqty túzetýler men tolyqtyrýlar engizip otyrady», deıdi Serik Bektenuly.
Áýlıeatalyq iri kompanııa sońǵy jyldary tenderge qatysyp, jer telimderin utyp alady. Ol jerde iri paneldermen 5 jáne 9 qabatty turǵyn úıler salady. Olardy ózderi qoljetimdi baǵamen satady. О́tken jyly Jýaly aýdanyndaǵy Túktibaı aýylynda 300 oryndyq mektep pen B.Momyshuly aýylynda bes qabatty turǵyn úı salyp, paıdalanýǵa beripti. Baızaq aýdanynda 6 kópqabatty úı qoldanysqa berilgen.
Bıyl memlekettik satyp alý konkýrsyna qatysyp, Baızaq aýdanynda 2,5 gektar jer telimin satyp alǵan. Ol aýmaqta 6 kópqabatty turǵyn úı boı kóteredi. Taıaýda Tarazdaǵy 14 shaǵyn aýdan aýmaǵynan tenderde 4,5 gektar jer utyp aldy. Keleshekte osynda úsh jylda 5 jáne 9 qabatty 10 úı el ıgiligine beriledi. Qazir olardyń jobalyq-smetalyq qujattary daıyndalyp jatyr.
Osy jyly kásiporyn Tarazdaǵy Qan ortalyǵy ǵımaratynyń qasynda 30 jáne 60 páterli eki elıtaly úıdiń qurylysyn bastaıdy. Bul ǵımarattarda turǵyndar bir jyldan keıin qonys toıyn toılaıtyn bolady. Bınomdyqtar memlekettik satyp alý konkýrstaryna qatysyp, iri de kúrdeli nysandardyń qurylysyn utyp alǵysy keledi. Buǵan olardyń áleýeti men kásibı sheberligi tolyq jetedi.
Seriktestik basshysynyń aıtýynsha, kompanııadaǵy mamandardyń áleýeti kez kelgen iri nysannyń qurylysyn sapaly atqarýǵa jetkilikti. Uzaq jyldar boıy jemisti eńbek etip kele jatqan «Bınom» JShS áli talaı aýqymdy jumysty atqaratynyna senim mol. О́ıtkeni, ujymda maman da, tehnıka da bar. Odan bólek qurylys materıaldaryn aıtarlyqtaı kólemde shyǵarýǵa barlyq múmkindik qarastyrylǵan.
Taraz
