Norvegter ózderiniń ata-tekterin Qazaqstannan izdeıdi

ASTANA. 17 aqpan. Norvegııalyq ǵalymdar ózderiniń ata-babalary budan myń jyl buryn Qazaqstan aýmaǵynda turǵan dep esepteıdi. Bul týraly Almaty.tv tilshisi habarlady. Osy taqyrypty tereńirek zertteý úshin Norvegııanyń bir top ǵalymdary Qazaqstanǵa keldi. Olar eki jaqty birlesken jańa «Qorǵan DNK» atty joba aıasynda jumys jasaıtyn bolady. Telearna muny Syrtqy ister mınıstrliginiń deregine silteme jasaı otyryp jetkizdi. Issapar kezinde norvegııalyq delegasııa Mádenıet jáne sport mınıstri Arystanbek Muhamedıulynyń qabyldaýynda bolyp, Qostanaı, Pavlodar jáne Qaraǵandy memlekettik ýnıversıtetteriniń ókilderimen kezdesý ótkizedi. «Jobaǵa qatysýshylar aldynda aıtarlyqtaı mindet tur. Ol - bizdiń protoúndieýropalyq tamyrymyzdyń ortaqtyǵyn dáleldeý. Ǵalymdar Qazaqstanda qorǵan-qorymdardan DNK-materıaldaryn jınaýmen aınalysatyn bolady. Olardyń nátıjesin álemge áıgili Kopengagen ýnıversıtetiniń genetıkalyq zerthanasynda  taldaıdy», - delingen habarlamada. Norvegııalyq mamandar belgili saıahatshy Týr Heıerdaldyń «vıkıngterdiń arǵy atalary Kaspııden tarady» degen boljamyn dáleldemekshi. Delegasııa quramynda Qazaqstanǵa kelgen onyń qyzy Bettına Heıerdal: «Bul meniń ákemniń sońǵy ekspedısııasynyń basty mindeti boldy. Lıngvıstıkalyq parallelderge súıene otyryp, vıkıngterdiń arǵy atasy olardyń qudaıy retinde sanalatyn Odınniń otany osy aımaqta ekendigine ol qatty sendi» - deıdi. Sonymen qatar, norvegııalyq tarıhshy Stýrla Ellıngvag: «Shamamen myń jyl buryn bizdiń arǵy atalarymyzdyń Ortalyq Azııa jáne Ońtústik Reseı aımaǵynda bir otany boldy. Qazirgi ǵylymnyń jetistikteri arqasynda biz ózimizdiń ortaq úıimizdi ashýǵa óte jaqynbyz», - degen tujyrym jasaıdy. Jobaǵa qatysýshylar Qazaqstan jáne Norvegııa arasyndaǵy uzaq merzimdi yntymaqtastyq  bizdiń tarıhı ata-babalarymyzdyń jáne qazirgi urpaqtardyń ortaqtyǵyn dáleldeýge múmkindik beredi, degen senimde. Murat Aıtqoja. Derek, foto: Almaty.tv.