Jyl saıyn tamyzdyń ekinshi jeksenbisine tuspa-tus keletin kásibı merekeni qostanaılyq qurylysshylar bıyl erterek atap ótti. Saltanatty jıynnyń shymyldyǵyn oblystyq fılarmonııanyń sımfonııalyq orkestri ashty. Ile sahnaǵa kóterilgen oblys ákiminiń orynbasary qurylysshylardy ataýly kúnderimen quttyqtap, óńirde qurylys salasynyń qarqyny joǵary ekenin aıtty.
«Oblysta keıingi eki jyl ishinde qurylys kólemi eki ese ulǵaıdy. Jyl basynan bergi ósim kólemi 56%-ǵa jetti. Búginde búkil el ıgiligin kórip otyrǵan záýlim úıler, zamanaýı mektepter, iri zaýyttar, tep-tegis keń joldar – osynyń bári sizderdiń eren eńbekterińizdiń aıǵaǵy. Sizder Memleket basshysy Qasym-Jomart Toqaevtyń «Qoljetimdi baspana qarapaıym halyqtyń armanyna emes, ómir shyndyǵyna aınalýǵa tıis» degen tujyrymdamasyn basshylyqqa ala otyryp, oblys turǵyndarynyń ómir súrý sapasyn arttyrýǵa úlken úles qosyp kelesizder. О́ńirde keıingi eki jyldyń ishinde ǵana 2 mln sharshy metrden astam baspana boı kóterdi. 2025 jyly taǵy 500 myń sharshy metr turǵyn úı salý josparda bar. Onyń 262 sharshy metri salynyp bitip, halyq ıgiligine berilip jatyr», dedi ákim orynbasary.
Berik Tańjaryqov óńirde qurylys materıaldaryn shyǵaratyn jergilikti kásiporyndardyń óndiris kólemi óskenin tilge tıek etti. Aıtýynsha, qurylys kompanııalary eń aldymen, óz ónimderimizdi paıdalanýǵa tyrysady. Osynyń nátıjesinde, jyl basynan beri qurylys materıaldary óndirisiniń kólemi 23 mlrd teńgeden asqan.
Oblys ákiminiń orynbasary quttyqtaý sózinen keıin tas qalaýshy, sylaqshy, árleýshi, konstrýktor, montaj jasaýshy, dánekerleýshi, ekskavator, kran basqarýshy, júk kóligin júrgizýshi, ardager qurylysshylar, Qostanaıdaǵy qurylys kolledjiniń ustazdaryna «Eren eńbegi úshin» medalin, «Qurmetti qurylysshy» tósbelgisin, oblys ákiminiń alǵyshattaryn tabys etti.
Kásibı mereke qarsańynda marapatqa ıe bolǵandardyń deni – qatardaǵy qurylysshylar. Sonyń biri – «Qurmetti qurylysshy» tósbelgisin alǵan «BK Stroı» qurylys kompanııasynyń mamany Maral Eshmuhametov. Shırek ǵasyrǵa jýyq ýaqyt qurylys salasynda eńbek etip júrgen tájirıbeli tas qalaýshy búginde kompanııanyń bir brıgadasyna jetekshilik etedi.
«Biz kelgende dál osy turǵan jer eshteńesi joq, taqyr dala bolyp jatatyn edi. Qazir bul jerlerdi «Altyn arman», «Iýbıleınyı», «Bereke» dep atalatyn sáýleti men sáni jarasqan, tirshiligi qaınaǵan úlken shaǵyn aýdandar basty. Qazir brıgadamyzda 20 shaqty adam bar. Bir jylda bir úı turǵyzamyz. Keıingi jyldary qurylysshynyń jaǵdaıy edáýir jaqsardy. Aılyǵymyz joǵary, syıaqy, eńbek demalysy beriledi. Úsh balam bar. Mynaý ásem úılerdi bizdiń ákemiz turǵyzdy dep olar da meni ájeptáýir maqtan tutady», deıdi tas qalaýshy.
Marapattaý rásiminen keıin kópshilik Qurylysshylar kúnine arnalǵan merekelik konsertti tamashalady.
Qostanaı oblysy
