Týǵan jerge degen perzenttik júrekten shyqqan bul óleńniń avtory – jergilikti aqyn Jandos Ámirǵalıev bolsa, basyna qaraǵanda taqııań túsetin dombyra músinin jáne óleń jolyn temirden dánekerlep jasaǵan – taǵy bir qaratóbelik azamat Jandos Aıtalıev eken.
- «Qaratóbege barsań, ánshimin deme» degen sóz bar bizdiń jaqta. Áıgili Muhıt ánshi Meráliulynyń, Ǵarıfolla Qurmanǵalıevtiń, keshegi Eskendir Hasanǵalıev aǵamyzdyń osy Qaratóbede týǵanyn meńzep aıtylǵan áńgime ǵoı. Qazaqtyń án áleminde «Muhıt mektebi» degen ataýdy qaldyrǵan atamyzdyń qurmetine osy dombyrany óz qolymmen, óz qarajatyma jasap, 2016 jyly ornatyp edim. 2017 jyly Astanadaǵy Báıterek kesheniniń shaǵyndaý modelin Qaratóbe aýdany ortalyǵynda turǵyzdym. Osynyń bárin týǵan jerime degen mahabbat jasatty, - deıdi Jandos Qadirsheuly.
Qara temirdi balqytyp, bir-birine jalǵaıtyn mamandyq ıesi Jandos Aıtalıev 1976 jyly Qaratóbe aýdanynyń Aqqozy aýylynda dúnıege kelipti. О́z aýylynda orta mektepti bitirgen soń Oral qalasyndaǵy qurylys tehnıkýmynda oqydy. Biraq toqsanynshy jyldardyń sońyndaǵy daǵdarys talaı jandy tentiretip jiberdi ǵoı. Bizdiń keıipkerimiz de túrli salada qyzmet etti. Biraz ýaqyt munaı aınalasyndaǵy «Saipem» kompanııasynda nápaqa tapty.
- Dánekerleýshi degen mamandyqtyń mańyzy zor ekenin eń alǵash sol jerde kórdim, - dep eske alady Jandos. Oǵan deıin de elektrmen pisiretin apparatty alyp jiberip, turmysqa, tirshilikke qajet jumysyn ózi tyndyra beretin aýyl balasy sheteldik kompanııadaǵy talapty jáne áriptesteriniń sheberligin kórip, tańdaı qaǵypty. Áıtpegende she, óz kásibin sheber meńgergen naǵyz mamannyń ár qımyly áserli bolady eken, elektrodty alyp turyp, tasqarańǵy áınektiń artynan ár shoqyǵany shedevr bolyp túskende tańǵalmasqa shara joq qoı.
Jandos dánekerleýshi mamandyǵynyń naǵyz shyǵarmashylyq jumys ekenin, maıtalman mamannyń mashyǵy yqylasty yjdaǵatpen jáne talaı jylǵy tájirıbemen keletinin túsindi. Sóıtip, «Energetık» oqý ortalyǵyna jazylyp, bul ónerdiń teorııasyna boılady. Ol kýrsty támamdaǵan soń KCG kompanııasyna jumysqa turdy. Bul jerde de Jandosqa taǵylymdy ustaz, tájirıbeli tálimger kezdesti.
«Maǵan osy ónerdi úıretken Muratbek Qaıyrsapauly Muhambedıev pen Ernııaz Eralyuly Údireevterdi ólgenshe umytpaımyn. Men olardan dánekerleý tehnıkasyn, ádis-tásilin ǵana emes, mamandyqqa degen mahabbatty, jaýapkershilikti de úırendim» deıdi Jandos.
Adam bir kásipti tereń meńgergen saıyn aınalasyna qajet adamǵa aınalady eken. Áýeli aınalasyna esik-tereze, qaqpa jasap, tájirıbe jınaǵan Jandos 2015 jyly «Yasin stroy kz» degen óz fırmasyn tirkedi. Iаsın degeni – tuńǵysh ulynyń esimi ǵoı. Bastapqyda kez-kelgen tapsyrysqa jarmasty. О́ıtkeni óz atyńdy dáleldeý, moıyndatý, halyq senimine ıe bolý ońaı emes. Birte-birte keıipkerimiz úlken jobalarǵa qol sozdy. Qurylysta sendvıch-panel dep atalatyn tehnologııa salasyn meńgerdi. Basynda Batys Qazaqstan oblysy aýmaǵynda júrse, keıin kórshiles Aqtóbe, Atyraý oblystarynan da tapsyrys túse bastady. Mine, búginde úsh qabatty saýda úılerin, kúrdeli ǵımarattardy qınalmaı turǵyza beretin qabyrǵaly mekemege aınaldy.
- «Is tetigin maman sheshedi» degen sóz burynnan bar ǵoı. Biraq árbir maqaldyń mánin óz basyńnan ótkergende anyq túısinedi ekensiń. Qazir meniń janymda ózimmen birge synalǵan 6-7 azamat bar. Biz birge úırendik, birge óstik. Qazir men kez-kelgen tapsyrys alyp, kez kelgen kúrdeli ǵımaratty turǵyza alatynyma ábden senemin. О́ıtkeni bizdiń ujym, bizdiń komanda – judyryqtaı jumylǵan, besaspap mamandar. Men jigitterime senemin, - deıdi Jandos.
Áńgimeniń basyn Jandostyń qaıyrymdylyq isimen bastap edik qoı. Keıipkerimizdiń týǵan jerge degen mahabbatyn byltyr – 2024 jylǵy kóktemgi sý tasqyny kezinde de kórdik. Batys Qazaqstan oblysynda byltyr tabıǵat apatynan eń aldymen zardap shekken – dál osy Aqqozy aýyly bolatyn. Sol kezderi Jandostyń jarǵaq qulaǵy jastyqqa tımedi. Ýatsap jelisinen aýyldastaryna kómek qolyn sozatyn top quryp, jedel qarajat pen kerekti zattardy jınaýdy jolǵa qoıyp, Oral qalasynan týǵan aýylyna birneshe márte qaıyrymdylyq kerýenin uıymdastyrǵanyna kýámiz. «Jandostyń týǵan jerine degen mahabbaty – ózi pisirip bekitken temirdiń jigindeı» deýge bolatyndaı. Múmkin odan da berik shyǵar.
Batys Qazaqstan oblysy
