Osy kórmege «DSK Prıorıtet» kompanııasy da óz ónimderin qoıǵan eken. Saǵatyna 235 tonnaǵa deıin joǵary sapaly asfalt-beton ónimin shyǵaratyn zamanaýı qos asfalt-beton zaýyty bar kompanııany náp-názik qazaq qyzy basqaratynyn bilesiz be? Uıymnyń quzyrynda ELKOMIX 60 beton zaýyty, topyraq aralastyrǵysh jáne bıtým-emýlsııalyq qondyrǵysy jáne bar! Qazirgi tańda kompanııada 300-ge jýyq qyzmetker jumys isteıdi. Olar barlyq jaǵdaıy jasalǵan jumysshy qalashyqtarynda turady. «Biz zamanaýı standarttarǵa saı qaýipsiz jáne uıymdasqan eńbek ortasyn quramyz, sondaı-aq qyzmetkerlerdi oqytý men kásibı damýǵa erekshe mán beremiz» deıdi Janna Kenjına.
Janna Tájiǵulqyzy qazynaly Qarashyǵanaǵymen álemge áıgili Bórli aýdanynyń ortalyǵy Aqsaı qalasynda týyp-ósken. Ata-anasy da qarapaıym jumysshy bolatyn. Eńbek jolyn temirjol stansasynda poıyz dıspetcheri bolyp bastaǵan Jannany es bilgeli eńbekpen shyńdalǵan jan dese bolady. Ol 2004 jyldan beri óz kásibin damytyp, 2008 jyly «DSK Prıorıtet» atty JShS qurdy.
- Jumysyn jańa bastaǵan mekeme senimge ıe bolyp, tolyqqandy tapsyrys alý úshin biraz ýaqyt kerek. Biz de alǵashqy kezde túrli mekeme aýlasyndaǵy ishki joldardy jasap júrdik. Keıin Samal shaǵynaýdanyna barar joldy jáne Asan aýyly men Juldyz shaǵynaýdanyna deıingi Táýelsizdik kóshesin tósep shyqtyq. Bilesiz be, sol kósheler maǵan áli kúnge ystyq! Úlken jaýapkershilikpen, mahabbatpen salǵandyqtan bolar, bir qabat qana asfalt tóselgen sol kóshelerge áli eshqandaı syzat túsken joq. 2011 jyly Oral qalasynyń kóp bóligin sý basqanda qazylyp qalǵan bólikteri bolmasa, keremet saqtaldy, - deıdi kompanııa basshysy.
Sodan beri qıyndyǵy mol, synaǵy kóp jıyrma jylǵa jýyq ýaqyt ótipti. «DSK Prıorıtet» Batys Qazaqstan oblysynda jol salatyn iri kompanııalardyń birine aınaldy. Búginge deıin kompanııa jalpy uzyndyǵy 1000 shaqyrymnan astam respýblıkalyq, oblystyq jáne aýyldyq mańyzy bar avtokólik joldaryn kúrdeli jóndep, salyp shyqqan. О́ńirdegi ınfraqurylymdy damytýǵa baǵyttalǵan memlekettik baǵdarlamalardy iske asyrýǵa, sondaı-aq respýblıkalyq, oblystyq jáne qalaishilik mańyzy bar avtokólik joldaryn salý jáne jóndeý jumystaryna belsene qatysatyn kompanııa kásibı biliktiliginiń arqasynda jol qurylysy salasynda turaqty ári jaýapty merdiger retinde tanyldy.
Janna Tájiǵulqyzynyń kompanııasy joldar men avtomagıstralderdi salyp qana qoımaı, jol-qurylys materıaldaryn óndiretinin joǵaryda aıttyq. Odan bólek, jol qurylysy salasynda zerthanalyq synaqtar júrgizý, arnaıy jol-qurylys tehnıkasymen qamtamasyz etý sekildi qyzmetterdi de qosa alyp júrgen úlken ujymnyń transport parkinde qazir jol qurylysy jumystaryna arnalǵan 100-den astam arnaıy tehnıka bar eken. Olardyń qataryna asfalt tósegishter, frezerlik mashınalar, jol taptaǵyshtar, avtogreıderler, samosvaldar, tıegishter, ekskavatorlar, býldozerler jáne basqa da tehnıkalar kiredi. Uıym óndiristik qajettilikterge sáıkes tehnıkalyq parkti jyl saıyn jańartyp, tolyqtyryp otyrady.
Kompanııa osy kezge deıin «QazAvtoJol» Ulttyq kompanııasynyń, «Karachaganak Petroleum Operating B.V.» alıansynyń, Batys Qazaqstan oblysy jolaýshylar kóligi jáne avtomobıl joldary basqarmasynyń, Oral qalasy, Báıterek, Bórli, Terekti jáne Tasqala aýdandary turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimderiniń tapsyrysyn oryndap, respýblıkalyq mańyzy bar «Podstepnoe-Fedorovka-RF shekarasy avtomobıl jolynyń biraz bóligin qaıta jańǵyrtty. Oblystyq mańyzy bar Tasqala-Aqqýraı-Bolashaq-RF shekarasy, Aqsaı-Shyńǵyrlaý, Terekti-Aqsaı avtokólik joldary ortasha jáne kúrdeli jóndeýden ótti. Oral qalasynda, Zashaǵan, Derkól, Krýgloozernoe kentterinde kósheler qaıta jańǵyrtylyp, kúrdeli jáne ortasha jóndeý jumystary jasaldy. Báıterek aýdanynyń aýyldaryna, sondaı-aq Bórli, Terekti jáne Tasqala aýdandarynyń eldi mekenderine kireberis joldary salyndy.
- Qazir biz Terekti-Aqsaı avtojolynyń 51,7-73 shaqyrymyna kúrdeli jóndeý júrgizip jatyrmyz. Jóndelýi tıis 21,3 shaqyrym joldyń 10 shaqyrymynda jumys tolyq jasaldy. Sonymen qatar respýblıkalyq mańyzy bar Podstepnoe-Fedorovka-Reseı shekarasy avtojolynyń 72-108 shaqyrymynda bıyl bastalǵan qaıta jańǵyrtý jumysy belsendi júrip jatyr. Joldyń 12 shaqyrymynda jerdiń tómengi qabatyndaǵy, 10 shaqyrymynda qosymsha qabattaǵy jumystar jasaldy. Shyńǵyrlaý ózeni arqyly ótetin kópirdiń qurylysy da qyzý júrip jatyr. Al Podstepnoe-Fedorovka-Reseı shekarasy respýblıkalyq mańyzy bar avvtojoldyń 108-144 shaqyrymynda jol qurylysy tolyq aıaqtaldy, qazirgi tańda aıaldamalar qoıyp, jol jıegin abattandyryp jatyrmyz, - deıdi Janna Tájiǵulqyzy.
«Negizinen er azamattar qyzmet etetin úlken kompanııany basqarý áıel adamǵa qıyn emes pe eken?» - Osyndaı oı oqyrmanǵa da keletin shyǵar. «О́zimdi bul salasyz elestete almaımyn. Jasyratyny joq, qıyn. Biraq ujymdy áıel adam basqarǵannyń artyqshylyǵy da bar. Men ár qyzmetkerdiń ishki dúnıesine úńilýge tyrysamyn. Jumysqa qulshynysyn, qabiletin baıqap júremin. Qalada jáne dalada jol salý – eki túrli. Oǵan qyzmetkerdi de laıyqty tańdaı bilý kerek. Ujymda kóbi er adam bolǵasyn meni qurmettep, árqashan qoldap júredi» deıdi qaısar qyz.
Taqtaıdaı tegis jol – batysqazaqstandyqtardyń baǵzydan kele jatqan bas aýrýy. О́ıtkeni óńirdegi respýblıkalyq mańyzy bar 1349 shaqyrym joldyń – 17%-y, jergilikti mańyzy bar 4834 km avtojoldyń – 44%-y qalypqa saı kelmeıdi. Keıde memlekettiń mıllıardtaǵan teńgesi jumsalyp jóndelgen joldyń sapasy da syn kótermeı jatady.
«Aqsaı qalasyna aıyna eki ret baratyn adam retinde aıtaıyn, 31 mlrd teńge qarajatqa Kazkomservıs salǵan jol men 15 mlrd teńgege DSK Prıorıtet salǵan joldyń aıyrmasy jer men kókteı» dep jazdy jaqynda áleýmettik jelige Oral qalalyq máslıhatynyń depýtaty Erlan Jumataev. Janna Tájiǵulqyzy basqaratyn kompanııanyń atyna jelide aıtylǵan osyndaı jyly pikir óte kóp. Kompanııa basshysy kópshilik synyna sergek qaraıdy, únemi yqylaspen jaýap berip otyrady. Eki uldyń anasy, shańyraqtyń uıytqysy bolyp otyrǵan jannyń taýsylmas ishki qýaty tańǵaldyrady. Ol Qazaqstan Isker áıelder qaýymdastyǵynyń belsendi múshesi. 2018 jyldan beri burynǵy Nur Otan, qazirgi Amanat partııasynyń qatarynda. VII shaqyrylǵan Oral qalalyq máslıhatynyń depýtaty. Qazaqstan Respýblıkasy Táýelsizdiginiń 30 jyldyǵy qarsańynda Janna Kenjına «Eren eńbegi úshin» medalimen marapattaldy.
Oǵan qosa oblys kóleminde qaıyrymdylyq qyzmetiniń damýyna erekshe úles qosqany úshin Janna Tájiǵulqyzy «Jomart júrek» syılyǵyna ıe boldy. О́ıtkeni «DSK Prıorıtet» kompanııasy bilim, mádenıet, sport jáne abattandyrý salalarynda turaqty qoldaý kórsetedi. Tek 2024-2025 jyldary ǵana kompanııa qaıyrymdylyq jáne áleýmettik jobalarǵa 50 mıllıon teńgeden astam qarjy bólgen eken.
«Qurylysshy – eń beıbit mamandyq» degen sóz bar halyqta. Onyń ústine qurylysshy – ana bolsa, názik jandy áıel bolsa, bul kásiptiń qadiri bıikteı túsetin sııaqty. Ádette áıel jany – ádemilikke jaqyn, úılesimdi qalaıdy, mahabbat-meıirimge mol bolady. Janna Tájiǵulqyzynyń únemi eldiń sharýasynda júretini, tynym tappaıtyny, sonyń ishinde qurylys salasyndaǵy túrli túıtkildi talmaı aıtyp, másele kóteretini – týa bitti minezinen. Batys Qazaqstan oblysynyń, Oral qalasynyń qoǵamdyq-saıası, áleýmettik-ekonomıkalyq tynys-tirshiliginde bizdiń keıipkerimizdiń qoltańbasy saırap jatyr.
Batys Qazaqstan oblysy
