Mereıli data aıasynda keshendi jospar bektilip, halyqaralyq, respýblıkalyq jáne óńirlik deńgeıde 100-den astam aýqymdy is-shara uıymdastyryldy. Is-sharalardy uıymdastyrýǵa júzdegen mádenıet qyzmetkeri, aspaz, tehnıkalyq mamandar, 500-den astam volonter jáne aýdannan kelgen ardagerler, salt-dástúr bilgirleri jumyldyryldy. 1-10 tamyz aralyǵynda 70-ten astam iri mádenı is-shara, 10 teatrlandyrylǵan qoıylym, 8 kórme men festıval, 5 sporttyq jarys, 5 respýblıkalyq jáne halyqaralyq shyǵarmashylyq joba qamtyldy.
Abaı Qunanbaıulynyń 180 jyldyq mereıtoıy – ulttyq aýqymdaǵy erekshe tarıhı-rýhanı oqıǵa. 10 tamyzda Abaı aýdanynda ótken aqynnyń 180 jyldyǵyna arnalǵan mereıtoılyq sharalarǵa 50 myńnan astam adam jınaldy. Onyń ishinde 15 elden sheteldik delegasııalar, ǵylymı jáne shyǵarmashylyq zııaly qaýym, óner ıeleri, jastar, týrıster men BAQ ókilderi boldy. Abaı aýdanynda 200-den astam kıiz úı tigildi.
Mereıtoı kezinde mádenı-rýhanı, tanymdyq, ıntellektýaldyq is-sharalarǵa basymdyq berildi.
«ABAI AKADEMIASY» atty ensıklopedııalyq portal iske qosylyp, Abaı murasy sıfrly keńistikke jol ashty. Túrkistan oblysynyń mádenı kúnderi aıasynda aýyl sharýashylyǵy ónimderiniń jármeńkesi, qolóner sheberleriniń kórmesi jáne ónerpazdardyń konserti uıymdastyryldy. Semeıge Túrkistan óńirinen 540 tonnadan astam ónim jetkizildi. Myńnan astam adam qatysqan «ABAI QUIZ» respýblıkalyq zııatkerlik oıyny ótti. Bul erekshe formattaǵy ıntellektýaldy joba Qazaqstan rekordtar kitabyna usynyldy. Semeı qalasynda zaǵıp jáne kózi nashar kóretin azamattarǵa arnalǵan arnaıy kitaphana ashyldy. Bul – mádenı-áleýmettik mekeme elimizdegi óńirlik deńgeıdegi eń iri jáne zamanýı ınklıýzıvti keńistik.
Mereıtoı aıasynda Naýryzbaı Aqbaıdyń «Abaı joly» ensıklopedııasy (qurastyrǵan – kórnekti qalamger Asqar Altaı), «Daryn» memlekettik jastar syılyǵynyń ıegeri Baǵashar Tursynbaıulynyń balalarǵa arnalǵan «Abaı Qunanbaıuly kim?» kitaby, «Abaı shyǵarmalarynyń úsh tomdyq akademııalyq jınaǵy» (qurastyrǵan – belgili ádebıettanýshy ǵalym, Ádebıet jáne óner ınstıtýtynyń dırektory Kenjehan Matyjanov), ǵalym, mádenıettanýshy Bazarbek Atyǵaıdyń «Abaıdyń aýdarma mektebi» monografııasy, Shəkərim týraly estelikter men jańa derekterdi qamtıtyn «Sheıit» jınaǵy, Ahat Shákərimulynyń «Jalynǵa malǵan júregin» jınaǵy (qurastyrǵandar – Aqberen Elgezek, Mereı Qart, Janna Ədilbekqyzy), Áset Medeýhanulynyń «Halıolla» hıkaıaty, Danııal Ysqaqovtyń shyǵarmalary, Shákárim ýnıversıtetindegi «Abaı jáne ulttyq rýhanııat» ǵylymı ortalyǵynyń mamandary daıyndaǵan AR «Qarasóz» kitaptary oqyrmanǵa jol tartty. Bul týyndylar alǵash ret kópshilik oqyrmanǵa usynylyp otyr.
Belgili ıllıýstrator Ańsaǵan Mustafanyń «Kóńilge túrli oı salar…» atty kórmesi, «Asyl mura» qolónershiler festıvali, «Adamzattyń alyby – hákim Abaı» mereıtoılyq konserti ótti. 2-3 tamyz kúnderi Qazaqstannyń halyq ártisi Maıra Ilıasovanyń «Aınaldym elim», Qazaqstannyń halyq ártisi, belgili kúıshi Seken Turysbekov pen «Aq jaýyn» orkestriniń «Abaı joly» konserti men Shahımardan Ábilovtiń «Oı tolǵaý – Hákim Abaı» monooperasy, dástúrli ánshi, kúıshi, sybyzǵyshylardyń qatysýymen ótken «Abaı álemi» rýhanı keshi kórermenniń ystyq yqylasyna bólendi.
Kásibı sportshylardyń qatysýymen 180 shaqyrymdyq «Semeı – Qaraýyl» ýltramarafony boldy. Abaı aýdanynda «Jeti qazyna» atty mádenıet, sport jáne týrızm festıvali uıymdastyryldy. Úsh kúnge sozylǵan shara aıasynda «Er jigit», «Sulý áıel», «Ilim-bilim», «Qyran búrkit», «Júırik at», «Qumaı tazy», «Beren myltyq» saıystary ótti.
«Memleket basshysy Qasym-Jomart Kemeluly Toqaev Qazaqstan halqyna arnaǵan jańajyldyq quttyqtaý sózinde «Uly Abaıdyń 180 jyldyq mereıtoıyn laıyqty atap ótýimiz kerek» dep arnaıy tapsyrma bergen bolatyn. Abaı toıy eń aldymen toı toılaıtyn emes, oı oılaıtyn basqosý bolmaǵy lázim ekenin barsha jurt aıtady. Mereıtoı tek sahnalyq mereke ǵana emes, ultqa paıdaly mura qaldyratyn naqty jobalar kezeńi de bolýy tıis. Bul toıdyń bederinde elge ıgilikti biraz sharýa atqaryldy. Toı tarap, ábiger basylǵan soń da el ıgiligine qyzmet ete beretin dúnıeler jasaýdy murat ettik» dedi oblys ákimi Berik Ýálı.
Oblysta mereıtoıǵa oraı Memleket basshysy Qasym-Jomart Kemeluly Toqaevtyń qoldaýymen «Abaıǵa qurmet» aksııasy bastaldy. Elimizdiń ár óńiri bir nysannan salyp beredi. Keshe Mańǵystaý Dostyq úıiniń qurylysyn bastasa, Shymkent shyǵarmashylyq ortalyqty, Túrkistan kórme ortalyǵyn, Astana keleshek mektebin, Aqtóbe jekpe jek ortalyǵyn, Pavlodar oblysy Ústel tennısi ortalyǵyn salýdy, Shyǵys Qazaqstan Ertis jaǵalaýyn abattandyrýdy josparlap otyr.
«Abaı-Shákárim» kesenesi aýmaǵynda «Etno aýyl Jıdebaı» kesheni boı kóteredi. Abaı aýdanynyń týmasy, mesenat Bektas Medǵatovtyń bastamasymen júzege asatyn, 60 gektar aýmaqty qamtıtyn keshen óńirdegi týrızmdy damytyp, rýhanı-mádenı murany dáriptep, Jıdebaıdy halyqaralyq týrıstik baǵyttardyń birine aınaldyrady.
Sonymen qatar Jıdebaı men Bórilide antenna-dińgekti qurylǵy ornatylyp, ınternet qosyldy. Osylaısha, Abaı toıy qarsańynda Abaı aýdany 100 paıyz ınternetpen qamtyldy.
