Aǵartýshylyq bastama aıasyndaǵy is-sharalardyń alǵashqysynda kitaphana dırektory Janat Sádibekqyzy onkúndik – aqyn murasyn tereń tanyp, sanamyzǵa sińirý jolyndaǵy mańyzdy mádenı oqıǵa ekenin qaperledi. Túrkistan qalalyq mádenıet úıiniń ánshileri Abaıdyń ánderin oryndap, «AKA» shyǵarmashylyq ortalyǵynyń akterlik úıirme músheleri «Bala Abaı» sahnalyq qoıylymyn kórermen nazaryna usyndy. Balalar men jasóspirimder kórkemsóz oqý úıirmesiniń oqýshylary jáne Ulttyq ulan 5574 áskerı bóliminiń sarbazdary aqynnyń óleńderin oqyp, kópshiliktiń yqylasyna bólendi. Sondaı-aq onkúndik aıasynda «Abaı danalyǵy – halyq murasy» taqyrybynda ótken ǵylymı konferensııada abaıtanýshy, fılologııa ǵylymdarynyń kandıdaty, dosent M.Áliphan, fılosofııa ǵylymdarynyń doktory, professor D.Kenjetaı, oblystyq ardagerler keńesi, «Áziret Sultan» ulttyq tarıhı-mádenı qoryq-mýzeıi ókilderi uly oıshyldyń ádebı jáne fılosofııalyq murasyna tereń úńilip, Abaı iliminiń qazirgi qoǵamdaǵy ózektiligi men mańyzyn atap ótti. Ǵylymı tujyrymdar men tyń ıdeıalar aıtyldy.
«Abaıdyń sózi – qazaqtyń boıtumary» atty ádebı kesh te áserli ótti. «Abaı joly» derekti fılminiń kórsetilimimen ashylǵan ádebı keshte aqynnyń ónegeli qara sózderi, danalyqqa toly óleńderi oqylyp, ánderi oryndaldy. Abaıdyń «Kózimniń qarasy», «Jelsiz túnde jaryq aı», «Segiz aıaq» syndy syrly sazǵa toly ásem ánderi «Kózimniń qarasy» atty án keshinde de shyrqaldy. Al onkúndik aıasynda ótken «Abaı – qazaqtyń rýhanı ustazy» atty oqyrman aýdıtorııasymen kezdesýde uly oıshyldyń ómir joly, shyǵarmashylyq murasy men fılosofııalyq tujyrymdary jaıynda derekter keltirilip, qara sózderi men óleńderinen úzindiler oqyldy.
Túrkistan oblysy
