Sýretti túsirgen – Igor BÝRGANDINOV
Jalpyhalyqtyq saýalnama eGov.kz portalynda 23 sáýirden 9 tamyzǵa deıin júrgizildi. Saýalnamaǵa barlyq óńirden jalpy sany 100 myńnan astam adam daýys bergen.
Alqaly jıynǵa qoǵam qaıratkerleri men zııaly qaýym ókili qatysty. Jınalǵandar bul bastamanyń el rýhanııaty úshin aıryqsha mańyzdy qadam bolǵanyn atap ótti.
Qazaqstannyń Halyq jazýshysy Tólen Ábdik tyń bastamanyń qazirgi qoǵamnyń ádebı talǵamyn kórsetetinin aıtty.
«Bul 100 kitap – halyqtyń suranysy. Árıne, tizimdi qarasaq, keı kitaptarǵa qarap tańǵalýymyz múmkin. Biraq búgingi oqyrmannyń suranysyn eskermeýge taǵy bolmaıdy. Bul – áli jalǵasyn tabatyn joba. Qazaq ádebıetiniń qorjyny 100 kitappen tolmaıdy. Mundaı izgi jobalardy halyqqa keńinen tanystyrý kerek», dedi jazýshy.
Al Jazýshylar odaǵynyń tóraǵasy, Ulttyq quryltaı múshesi Mereke Qulkenov: «Ádebı saýalnama bastalǵan kezde halyq qalaı daýys berer eken dep kúmándanyp qalǵanym ras. Biraq nátıjesinde, 100 myńnan asa oqyrman daýys beripti. Bul – aıtarlyqtaı kórsetkish. Álemde de mundaı tájirıbeler jıi jasalyp turady», deıdi.
Jıynǵa qatysqandardyń pikiri boıynsha, bul joba qazaq ádebıetin nasıhattaýǵa yqpal etip qana qoımaı, kitap óndirisine de, kitaphana isine de sony serpin beredi.
Qorytyndy tizimge klassıkalyq shyǵarmalardan bastap, qazirgi zaman avtorlarynyń da týyndylary endi.
Tolyq tizim Ulttyq quryltaıdyń resmı saıtynda jarııalandy. Bul joba endi turaqty túrde jalǵasyp, tizim jańartylyp otyrady.
