Bilim men bilikti, eńbek pen tájirıbeni, tózim men sabyrdy serik etken jumysshy mamandardyń el ishinde alatyn ornyn bólip, jaryp qaraýǵa bolmas. Dese de ómir úshin ózekti, zamanaýı sheshimder elektr energııasymen baılanysyp jatqan tusta olardyń qyzmetinsiz tirshilikti dóńgeletý múmkin emes. Iá, áńgime joǵary, tómengi kerneýli tokty tap basyp júrgen – elektr mamandary týraly bolyp otyr. Olardyń jumysy kún men túnge, aýa raıynyń ystyq-sýyǵyna qaramaıdy. О́ıtkeni búginde tokqa telingen jumys úderisi saǵat tyrsylyndaı taqyldap turýy asa mańyzdy. Osyndaı mańyzdy mindetti Darhan Ybash 11 jyldan beri atqaryp júr.
Elordany úzdiksiz elektr qýatymen qamtamasyz etip otyrǵan «Astana-AEK» AQ qyzmetkeri S.Seıfýllın atyndaǵy Qazaq agrotehnıkalyq zertteý ýnıversıtetin «Elektr energetıkasy» mamandyǵy boıynsha támamdaǵan. Darhan Batyrhanuly bilikti elektr mamany bolyp qalyptasý úshin bala kezden bap kerek deıdi. Sebebi, ózi balǵyn shaqtan jańa dúnıe qurastyrýǵa, isten shyqqan tehnıkaǵa jańa ómir syılaýǵa áýes bolǵan. Keıinnen balasynyń bul qyzyǵýshylyǵyn keıipkerimizdiń ákesi mehanık Batyrhan Ybashuly baıqap, janyna ala júrip, bilgenin búkpesiz úıretken. Keıipkerimizdiń aıtýynsha, ómiriniń osy kezeńi bolashaqta energetıka mamany bolýǵa sheshim qabyldatqan aıtýly sátter bolypty.
«Áke – balaǵa qashanda úlgi. Olar perzentiniń taǵdyryna beısanaly túrde yqpal ete alady dep oılaımyn. Meniń mysalymda, men áke jolyn jalǵadym. Uıada kórgenimdi ildim. Ákem tehnıka tilin sózsiz túsindi, men elektr symdarynyń qyr-syryn meńgerdim», dep túsindirgen Darhan Ybash eńbek jolyn 3-dárejeli elektromonter bolyp bastaǵan.
«Elektrık 1-aq ret qatelesedi» degen astarly sóz bar. Bul qaǵıda ár elektr mamanynyń jadyna bolattaı bekigen. Sondyqtan JOO qabyrǵasynan jańa shyqqan maman «á» degennen kerneýli alańǵa jiberilmeıdi, elektr baǵandarymen joǵary kóterilmeıdi. «Astana-AEK» AQ kásipornyndaǵy aǵa sheberler jas mamandardyń meńgergen teorııasyn is júzinde ıgerýge ýaqyt beredi. Darhan Batyrhanuly alǵashqy eńbek jolyndaǵy osy syndarly kezeńde kórgen-bilgeni, kókeıge túıgeni búginde jadnamaǵa aınalǵanyn aıtyp berdi.
«Jan qalaýymen tańdalǵan mamandyqty meńgerýge ystyq yqylas qashan da tabylady. Sondyqtan tájirıbeli elektrıkterdiń bóliskenin qulaǵyma quıyp otyrdym. Alǵash elektr baǵanyna kóterilgendegi qobaljýdy jeńip, tapsyrmany tas-túıin oryndaı aldym. Bul «joryq» boıymda senim otyn jaqty. Sondyqtan, jumysshy mamandyqtardy tańdaıtyn jastardy batyl qadam jasaýǵa, bilim alǵan mamandyǵy boıynsha jumysyn jalǵastyrýǵa shaqyramyn», deıdi ol.
Kóp eńbek etkenge baqyt basyn ıetini anyq. Keıipkerimiz kásibı sheberligin úzdiksiz jetildirip, eńbekqorlyǵynyń arqasynda 2 jyldan keıin sheber laýazymyn ıemdengen. Baıqońyr aýdanyna qarasty qosalqy stansııalardyń úzdiksiz qyzmet etýin qamtamasyz etetin maman tehnologııa tez túrlenip jatqan jańa ǵasyrda biliktiligin shyńdaýǵa aıryqsha den qoıady.
«Bul turǵyda «Astana-AEK» AQ kásiporny da qyzmetkerleriniń kásibıligin arttyrýǵa múddeli. Jyl saıyn mamandar tobyn Chehııa, Polsha syndy Eýropa elderine tájirıbesin tolystyrýǵa jiberip otyrady. Menińshe, maman osyndaı qosymsha qoldaýlardan bólek jańashyldyqtarǵa irkilmeı ilesip, óz betinshe izdenip otyrýy tıis. Shetelde elektrık mamandar bilgenin vıdeohostıngterde bólisip otyrady. Sondaı arnalardy da kádeme jaratamyn», dep paıdaly keńesimen bólisken Darhan Batyrhanuly búginde - aǵa sheber. Salanyń qara qazanynda qaınap, shıraǵan aǵa sheberler endigi jas mamandarǵa jetekshi. Sondaı-aq, aýdandyq jelilerdiń senimdi jáne sapaly jumysyn qamtamasyz etý úshin jóndeý jumystaryn aldyn-ala josparlaý, aqaýly qurylǵylardy erte anyqtaý mindetteri júkteledi. Biz barǵan kúni aǵa-sheber Darhan Astana qalasyna qarasty №4 kılovolt áýe jelisiniń elektr baǵandaryn jańartyp jatqan topqa bastamashy bolyp júr eken.
«Bul ýchaskede baǵandardy jańartý 1 apta aldyn bastalǵan, al ony aýystyrý 1-2 jyl buryn josparlanǵan bolatyn. Mundaǵy maqsatymyz elektr jelisiniń múltiksiz jumys isteýi men tutynýshylardy turaqty elektr energııasymen qamtamasyz etý. Qaýipsizdik erejesine saı, arnaıy tehnıkany paıdalanyp ortasha eseppen kúnine 5-7 baǵandy aýystyramyz. Ádette, aǵash ne beton baǵanalardyń qyzmet etý merzimi – 25-30 jyl shamasynda bolady. Dese de klımattyq mehanıkalyq jaǵdaılar merzimdi qysqartýy múmkin. Sondyqtan aldyn ala tekserý júrgizemiz», dedi Releılik energetıkalyq júıeler brıgadasynyń 1 - top aǵa sheberi.
Ár istiń qıyndyǵy men qýanyshy qatar júretini belgili. Keıipkerimizden ýaqytpen sanaspaı istep júrgen qyzmetiniń eń jarqyn sáti qaısy ekenin suradyq.
«Joǵary da atap ótkenimizdeı jóndeý jumystaryn aptalap atqaryp jatamyz. Sondaı kezde jaryq ta turǵyndarǵa qoljetimsiz bolady. Telefon qýattaýdan bastap, as ázirleý, kompıýtermen atqarylyp jatqan jumystar bári-bári tokqa táýeldi. Sondaı kezde turǵyndardyń da taǵatsyzdanyp ketetin tustary bar. Al jaryq berilgendegi qýanyshy – bir tóbe. Osyndaı qýanyshtan keıin turǵyndar iltıpatyn bildirip jatady. Men muny Qazaqstan azamaty retinde halyqqa qyzmetim retinde qabyldap, marqaıyp qalamyn», dep jaýap Darhan Batyrhanuly.
Ataýly jylda atalmaı jatqan másele de jeterlik. Biz buǵan keıipkerimizben tildesý barysynda kóz jetkizdik. Sonyń biri ári biregeıi – jalaqy jaıy. Aǵa sheber, 4 balanyń ákesi Darhan Ybash naryq qos búıirden qysyp turǵanda elektr mamandarynyń jalaqysy básekege qabiletti bolmaı turǵanyn jetkizdi.
«Muhtar Áýezov «Eńbek shyqqan jerden – tózim de shyǵatynyn dóp aıtqan». Kún saıyn qaýippen betpe-bet keletin mamandar osy támsilge boıusynyp otyrmyz. Dese de otbasyn adal eńbekpen asyrap otyrǵan azamattardyń jalaqysy artsa alańsyz ter tóger edi», dep túıdi ol.
Elektr energııasy – tirshilik kózi, sala mamandary – qozǵaýshy kúsh. Olar meńgergen mamandyǵyn jaýapkershilik pen izdenis prızmasynan qaraǵanda tutas óndiris órkendeıdi. Qoǵam ıgiligi úshin eńbek etip júrgen jumyssha mamandardyń eńbegi qoldaý men qurmetke qashan da laıyq!
