Is-sharaǵa Qazaqstan halqy Assambleıasy Tóraǵasynyń orynbasary Marat Ázilhanov, QR Parlamenti Senatynyń depýtaty, respýblıkalyq «Jomart Jan» ortalyǵynyń basshysy Evgenıı Bolgert, elordalyq etnomádenı birlestikterdiń ókilderi jáne qoǵamdyq belsendiler qatysty.
Alań Qazaqstan halqy Assambleıasynyń bastamasymen jáne uıymnyń 30 jyldyǵyna oraı 2025 jylǵy 1 mamyrda ótken «Birlik júgirisi» qaıyrymdylyq marafony kezinde jınalǵan qarajatqa salyndy. Joba QHA-nyń «Jeńis – birlikte» sporttyq platformasy aıasynda júzege asyrylyp, múmkindigi shekteýli jandarǵa qoljetimdi sport ınfraqurylymyn damytýǵa baǵyttalǵan jalpyulttyq qozǵalystyń mańyzdy bóligine aınaldy.
Astanadaǵy bul alǵashqy sport alańynyń ashylýy Qazaqstannyń barlyq óńirlerin qamtıtyn izgi dástúrdiń bastaýyna aınalyp otyr. Joba uıymdastyrýshylarynyń aıtýynsha, bul bastama qoǵamdaǵy birlik pen ózara qoldaýdyń naqty úlgisi bolyp, el azamattaryn qaıyrymdylyq pen áleýmettik jaýapkershilikke jumyldyrady.
