Sýretti túsirgen – Asylbek Násipqalıuly
Jobanyń alǵashqy kúni Batys Qazaqstan oblysy ákiminiń orynbasary Qaıyrjan Meńdiǵalıev oblys jáne aýdannyń belsendi jastarymen kezdesti. Ol kezdesýde kóterilgen oılar men usynystar aýyl jastarynyń qoǵam ómirine belsendi aralasýǵa daıyn ekenin kórsetkenin atap ótti.
– Biz jastardyń jumysqa ornalasý, bilim alý jáne bos ýaqytty tıimdi paıdalaný baǵytyndaǵy bastamalaryn qoldaımyz. Jastardyń ıdeıasy – aýyldyń, óńirdiń damýyna qosylǵan úles. Eń bastysy, jastar alǵa qoıǵan maqsattan taımaı, jańa múmkindikterdi paıdalana bilýi kerek, – deıdi Qaıyrjan Ermekuly.
Osy jıyn barysynda jastar arasyndaǵy belsendi azamattar, ásirese qaıyrymdylyq sharalaryna belsene qatysyp júrgen erikti, jas kásipker Dana Ermuhanova, jıhaz sehyn damytyp otyrǵan kásipker, mesenat Erbol Aıapov, qus sharýashylyǵyn jolǵa qoıyp, memlekettik grant ıegeri atanǵan Manas Asylhanuly,tártip saqshysy, polısııa qyzmetkeri Orazǵalı Orazymbetov syndy qyz-jigitter alǵyshatqa ıe boldy.
«Aýyl life» jobasy aıasynda belgili shashtaraz Berik Qaıyrsha «Qaıshydaǵy kreatıv», SMM maman, bloger Ádemi Jarasova «Bizdiń álem», bloger, qolóner sheberi Darajat Haparova «Balalarymyzdy búginnen damytaıyq» taqyrybynda sheberlik saǵatyn ótkizip, óz tájirıbelerin aıtyp berdi. Sonymen qatar joba qatysýshylary aýdandyq tarıhı-ólketaný mýzeıin, aýdandyq ortalyqtandyrylǵan kitaphanany aralap kórip, jumysymen tanysty.
Aýyl jastarynyń ómirin qamtyǵan ekinshi kúngi is-sharalar da óte qyzyqty ótti. «Saýyp ishkenniń dámi bólek» atty baıqaýda qyzdar sıyr saýý sheberligin synǵa salsa, «Qasterli kásip» bóliminde jigitter qoı soıýdyń dástúrli ádisterin kórsetip, etti músheleý men óńdeýdiń qyr-syryn tanystyrdy. Kelesi bólimde arýlar ulttyq taǵamdardy daıyndap, dámi til úıirer as mázirin usyndy. Al «Birlik kúsh beredi» atty saıysta komandalar arqan tartysyp, kúsh synasty. Budan keıin jigitter asaýǵa quryq salý sheberligin kórsetip, atqa minýdiń ádisterin tanystyrsa, qyzdar «Aýyldyń aq dámi» dep qurt daıyndaýdyń dástúrli tásilderin kórsetti. Sońynan jigitter qoı kóterip, láńgi teýip te jarysty. Al qyzdar urshyq ıirýden synǵa tústi.
Tartysty ótken jarysta I oryndy «Qosózen» komandasy ıelense, II oryndy «Jarqyra» komandasy, III oryndy «Rýh» komandasy qanjyǵaǵa baılady.
– Bul aýyl jastaryn bir serpiltken joba boldy. Jastar jańa ıdeıalarmen qanattanyp ketti. Osyndaı jobalar arqyly aýylymyzdyń áleýeti arta túsedi dep oılaımyn, – deıdi Qaztalov aýdany ákiminiń orynbasary Serik Qaıyrlıev.
Al kreatıvti is-sharaǵa kelgen Bıbinur Hamıt esimdi qatysýshy osy jobanyń arqasynda alǵash ret kıiz úıge túnegenin aıtty. Ol shańyraqqa qarap jatyp, jerden erekshe bir qýat alǵan sezimin de jasyra almady.
– Tańǵy salqynmen oıanyp, kúnniń shyǵýyn tamashaladyq. Tabıǵattyń tylsym tynysy janymyzǵa tynyshtyq syılady. Joba aıasyndaǵy ekinshi kún de erekshe bastaldy. Jigitter qoı soıyp, qyzdar et asyp, nan ılep, aýyl ómiriniń qyzyqty sátterin bastan ótkerdi. Jún tútip, urshyq ıirý sekildi umytylyp bara jatqan dástúrli isterge aralasyp, sonaý balalyq shaqtaǵy áje-analardyń meıirimi men jylýyn eske alǵan qatysýshylar kózderine jas aldy. «Aýyl life» jobasy ulttyq rýhymyzdy oıatty, – deıdi B.Hamıt.
Batys Qazaqstan oblysy
