«Bilimdi biriktirip, bolashaqty qalyptastyramyz» atty jahandyq bul jıyn 18 tamyzda Astananyń EKSPO Kongress-holynda bastalyp, 22 tamyzda qorytyndylanady. Oǵan álemniń 114 elinen 1 myń 600-den astam delegat qatysady. Qazaq jerine álemdik kitaphanashylar qaýymyn IFLA prezıdenti, Kvınslend (Aýstralııa) kitaphanasynyń bas dırektory Vıkı Makdonald bastap keledi.
Elimiz tarapynan «Kazakh Tourism», Astana qalasynyń ákimdigi, Ǵylym jáne joǵary bilim mınıstrligine qarasty JOO kitaphanalary qaýymdastyǵy birlesip úılestirgen osy is-shara mádenıet, bilim, týrızm salasyna serpin beredi.
IFLA – kitaphana isindegi kásibı mamandardyń eń iri jahandyq uıymy. Ol 1927 jyly Shotlandııanyń Edınbýrg qalasynda qurylǵan. Qazir bul mádenı uıymnyń shtab-páteri Nıderlandtyń Korol kitaphanasynda (Gaaga) ornalasqan. Halyqaralyq uıym túrli elderdegi kitaphana isiniń ozyq tájirıbesin jınaqtap, taldap, qyzmet kórsetý men aqparat almasý isin uıymdastyryp otyrady.
Astanada ótetin IFLA-nyń Dúnıejúzilik kongresi elimizdiń iskerlik týrızm ustanymyn nyǵaıtýdy, sondaı-aq sala mamandarynyń kásibı deńgeıin jetildirý men aqparattyq qyzmet sapasyn arttyrýdy kózdeıdi. Mańyzdy jıyn Ortalyq Azııa kitaphana qaýymdastyǵynyń kásibı bedelin de kóteredi.
Prezıdent Qasym-Jomart Toqaev Ulttyq quryltaıdyń Atyraýda ótken otyrysynda kitaphana salasyna memlekettik, qoǵamdyq kózqarastyń júıeli, dáıekti bolýyn atap ótkeni málim. Jýyrda ǵana «100 kitap» ulttyq saýalnamasynyń qorytyndysy jarııalandy. IFLA kongresi ár eldegi kitaphanaǵa qatysty tyń jobalar men álemdik mádenı yqpaldastyqty tolyq qoldaıdy.
«IFLA-nyń Dúnıejúzilik kongresin ótkizýge Qazaqstan JOO kitaphanalar qaýymdastyǵynyń sátimen atsalysqany – mańyzdy qadam. О́ıtkeni joǵary mekteptiń negizgi baǵyty kitaphana júıesin jetildirýge jáne álemdik jańa ádebıetterdi qoljetimdi etýge baǵyttalǵan. Ýnıversıtetter – qashanda bilim, ǵylym, mádenıet úshtaǵanynyń úılesimi», deıdi Ǵylym jáne joǵary bilim mınıstri Saıasat Nurbek.
Týrızm baǵytyna kelsek, bul kongress Astanaǵa shamamen 2 mln eýro tabys ákelýge tıis. Qarjylyq kiris sheteldik delegattardyń qonaqúı, kólik, tamaqtaný, t.b. qyzmetterge jumsaǵan shyǵyndary esebinen quralady.
Kongress aıasynda Astanadaǵy joǵary oqý oryndary men mádenıet mekemelerinde aıtýly kezdesýler, pikir almasýlar ótedi.
Sabyr ShÁRIP
