Petısııa avtorlary mektep formasy balalardyń oqý úlgerimine áser etpeıtinin, otbasy bıýdjetine qosymsha shyǵyn týǵyzatynyn aıtty. Belsendiler jeńildetilgen kıim úlgisin engizýdi usynyp otyr.
Eki balasy birdeı bastaýysh synybynda oqıtyn ana Álııa Tuıaqbaeva formany tańdaý óz otbasylary úshin qajet bolmaǵanyn aıtty — mektep aldyn ala kıim úlgisin jáne ony satyp alý kerek dúkendi belgilep qoıǵan. Onyń ústine, ol dúken brendtik bolyp shyqty, al balalardyń syrtqy kelbetine qoıylatyn talaptar jyl saıyn kúsheıip keledi.
«Eki balaǵa biz shamamen 130 myń teńge jumsadyq, bul somaǵa jeıdeler kirmeıdi. Kostıým-úshtik, jılet, shalbar, al fasony — qatań úlgide, bantıkter, tósbelgiler. Meniń oıymsha, mektep formasynyń túsin ǵana belgileý jetkilikti bolar edi», deıdi Álııa.
Satýshylardyń aıtýynsha, mektep formasynyń baǵasy jyl saıyn 10–15 paıyzǵa qymbattap otyrady. Mysaly, Almatyda blýzka men jeıdelerdiń baǵasy 5 myń teńgeden bastalady, al tolyq jıyntyq shamamen 35 myń teńgege túsedi, buǵan aıaq kıim kirmeıdi.
Buǵan qaramastan, sheneýnikter mektep formasy oqý úderisine oń áser etedi dep esepteıdi.
«Mektep formasy iskerlik jáne oqý atmosferasyn qalyptastyrady, oqýshylar arasyndaǵy teńdikti arttyrady, býllıngti azaıtady, sondaı-aq balalarǵa psıhologııalyq turǵydan jumysqa jáne tártipke beıimdelýge kómektesedi», dedi Oqý-aǵartý mınıstrliginiń ókili Mereke Amangeldiqyzy.
Alaıda ata-analar bul pikirmen kelispeıdi. Olardyń aıtýynsha, forma oqý úlgerimin arttyrmaıdy, kerisinshe shyǵyndy kóbeıtip, oqýshylardyń syrt kelbetin baqylaýǵa májbúr bolatyn muǵalimderdiń nazaryn basqa jaqqa aýdarady.
Petısııa bastamashylary kelesi usynystaryn alǵa tartty:
-
Mindetti mektep formasyn alyp tastaý;
-
Iskerlik atmosferany saqtaıtyn, biraq oqýshylarǵa ózderiniń daralyǵyn eskerip, yńǵaıly ári qoljetimdi kıim tańdaýǵa múmkindik beretin aqylǵa qonymdy forma engizý;
-
Resýrstardy bilim sapasyn arttyrýǵa jáne ınklıýzıvti mektep ortasyn qurýǵa baǵyttaý.
Petısııa úkimette qaralýy úshin ony 50 myń adam qoldaýy tıis.
