Halyqty turǵyn úımen qamtý jergilikti atqarýshy bılik ókilderiniń basty mindeti ekenin Memleket basshysy Qasym-Jomart Toqaev ta udaıy aıtyp keledi. Prezıdent tapsyrmasyn júzege asyrý maqsatynda Taraz qalasynda keıingi ýaqytta aýqymdy jumys atqarylyp jatyr. Jaýapty tulǵalar birinshi kezekte áleýmettik osal toptaǵy azamattardyń jaǵdaıyn jasaýǵa basymdyq berip keledi.
«Qazir qala boıynsha 22 myńnan astam azamat páter alý úshin kezekte turǵany belgili. Rasynda turǵyndardy baspanamen qamtý – ózekti. Al bul túıindi sheshý – bizdiń mindetimiz.Shahar halqyn turǵyn úımen qamtý máselesin júıeleý maqsatynda oblys ortalyǵynda aýqymdy jumystar atqarylyp jatqanyn kózi qaraqty qaýym kórip, bilip otyr. Máselen, byltyr «Sáýlet» shaǵyn aýdanynda 16 kópqabatty turǵyn úıdiń 12-si paıdalaný úshin qabyldandy. Al qalǵan birneshe kópqabatty turǵyn úıdiń qurylys jumysy osy jylǵa ótpeli bolyp tur. Jalpy, oblys ortalyǵynda keıingi birneshe jyldyń bederinde jańa shaǵyn aýdandarda boı kótergen kópqabatty turǵyn úıler esebinen júzdegen otbasy baspanaly bolyp, qonys toıyn toılaǵany málim», deıdi Taraz qalasynyń ákimi Baqytjan Orynbekov.
Rasynda, Tarazdaǵy «Uly dala» shaǵyn aýdany bir qaýym el qonystanǵan aımaqqa aınalyp otyr. Oblys ortalyǵy eki ákimshilik aýdanǵa bólingeli beri dál osy «Uly dala» shaǵyn aýdanynda abattandyrý jumysy joǵary deńgeıde júrgizilip jatyr. Birinshi jarty jyldyqta atalǵan shaǵyn aýdanda 34 kópqabatty turǵyn úıdiń 12-si paıdalanýǵa berilipti. Qalǵan 22 úıdiń qurylysy qarqyndy júrgizilip jatyr. Budan bólek, el arasynda 14-shaǵyn aýdan atalyp ketken «Áýlıeatada» 22 kópqabatty turǵyn úıdiń qurylys jumysy qolǵa alynǵan.
«Asanbaı Asqarov kóshesiniń aıaǵyndaǵy turǵyn alabyna qosymsha 66 úıdiń jobalaý-smetalyq qujattamalary ázirlenip, saraptama qorytyndysy alyndy. Respýblıkalyq bıýdjetke ótinim joldanyp qoıylǵan. Bul 66 turǵyn úıdiń 30-ynyń qurylysyn osy jyly bastaý josparlanǵan.
Budan bólek, «Turǵyn úı-kommýnaldyq ınfraqurylymdy damytýdyń 2023–2029 jyldarǵa arnalǵan tujyrymdamasy» aıasynda 2024 jyly halyqtyń áleýmettik osal toptary úshin 9,9 mlrd teńgege 669 páter satyp alyndy. Onyń ishinde respýblıkalyq bıýdjet esebinen 2,1 mlrd teńgege 162 páter satyp alynsa, 2025 jyly áleýmettik osal toptar úshin 140 páter satyp alýǵa respýblıkalyq bıýdjetten 1,9 mlrd teńge qarastyryldy», deıdi qala ákimi.
Qala ákimdigi 2005 jyldan kúni búginge deıin baspana kezeginde turǵan azamattardyń máselesin birtindep sheshý úshin naqty jumysty qolǵa aldy.
«Jergilikti halyqtyń ótinishin kezeń-kezeńimen qanaǵattandyrý maqsatynda Asanbaı Asqarov kóshesiniń aıaǵynan 312 gektar, «Hamýkat» alabynan 126 gektar jáne «Qarasaıdan» 126,6 gektar jer qarastyrylyp jatyr. Jalpy kólemi 564,6 gektardy quraıtyn jer telimin memleket menshigine alyp, ınfraqurylym júrgizý úshin naqty jumystar atqarylady. Qazirge deıin 16 sharýa qojalyqtan jer ýchaskeleri memleket menshigi úshin qaıtaryldy. Búgingi tańda jeke turǵyn úı qurylysyna jer kezeginde turǵan azamattarǵa jer telimin berý maqsatynda tıisti jumystar óz deńgeıinde júrgizilip jatyr», deıdi B.Orynbekov.
Oblys ortalyǵyndaǵy kópqabatty turǵyn úılerge kúrdeli jóndeý jasaý ótken jyly qolǵa alynǵan bolatyn. Nátıjesinde, tozyǵy jetken kóp úıge ýaqyt talabyna saı jóndeý júrgizildi. Qala basshysynyń aıtýynsha, qolǵa alǵan bul is aldaǵy ýaqytta da jalǵasyn tabatyn kórinedi.
«Taraz qalasynda 1438 kóppáterli turǵyn úı bar. Olardyń 151-i barak tıptes bolsa, 1287 kópqabatty turǵyn úı ekenin aıta ketken jón. Oblys ortalyǵyndaǵy 1103 úıdiń paıdalanýǵa berilgen merzimi 30 jyldan asyp ketken. Onyń 553-i kúni búginge deıin kúrdeli jóndeýden ótkizilse, qalǵan 550 úı dál sondaı kúrdeli jóndeýdi qajet etedi. Oblys ákimi Erbol Qarashókeevtiń tapsyrmasyna sáıkes, qalanyń ortalyq kóshelerindegi turǵyn úılerdiń biryńǵaı sáýlettik kelbetin jańartý jobasy boıynsha bıyl Abaı dańǵyly, Áıteke bı, Qazybek bı kóshelerindegi 16 úıdiń sáýlettik kelbetin jańartyp, qaladaǵy jóndeýdi qajet etetin úılerdiń sanyn azaıtamyz dep otyrmyz. Qazirde úılerdiń jóndeý jumystary bastalyp ketti», deıdi qala ákimi.
Taraz
