9–10 tamyzda ótken «Sandyq aqparatpen jumys isteý qabiletin baǵalaý» atty ekinshi testileý blogyna 2 597 úmitker qatysqan bolatyn. Irikteý tártibine sáıkes, úshinshi kezeńge eń joǵary ball jınaǵan 600-den aspaıtyn kandıdat (ár salalyq baǵyt boıynsha – 100-den aspaıtyn) jiberiledi.
Alaıda birdeı nátıje kórsetkender bolǵandyqtan, bul joly kelesi kezeńge 683 úmitker ótti. Salalyq baǵyttar boıynsha ótý baly tómendegideı:
- Agroónerkásip jáne ekologııa – 13 ball;
- Syrtqy saıasat jáne ınvestısııalar – 16 ball;
- Infraqurylym, ónerkásip jáne saýda saıasaty – 20 ball;
- Áleýmettik saıasat jáne azamattyq qoǵam – 18 ball;
- Sıfrlandyrý – 18 ball;
- Ekonomıkalyq jáne qarjylyq saıasat – 18 ball;
Kandıdattardyń tolyq tizimi pkrezerv.gov.kz resmı portalynda jarııalandy.
Úshinshi kezeń – «Sıtýasııalyq tapsyrmalardy sheshý» – bıylǵy jyldyń 16 tamyzynda ótedi. Bul kezeńde memlekettik qyzmetke tán naqty jaǵdaılarda basqarýshylyq sheshim qabyldaý qabileti baǵalanady.
Barlyq qatysýshylar 15 tamyz saǵat 23:59-ǵa deıin (Astana ýaqytymen) jeke kabıneti arqyly tirkelýi tıis. Irikteý barysynyń ashyqtyǵy men ádildigin qamtamasyz etý maqsatynda proktorıng júıesi qoldanylady. Talaptardy buzý – sonyń ishinde bógde kómekti paıdalaný, AnyDesk, TeamViewer sekildi qashyqtan basqarý baǵdarlamalaryn qosý, kamera nemese mıkrofondy óshirý, smartfon men qulaqqap qoldaný, test mazmunyn kóshirý – nátıjelerdi joıýǵa negiz bolady. Kandıdattar úshin arnaıy nusqaýlyq jeke kabınette ornalastyrylǵan.
