Prezıdent Ahmet Baıtursynulynyń «Mekteptiń jany – muǵalim» degen qanatty sózin eske sala otyryp:
«Biz órkenıetti el bolamyz desek, ustazdarǵa barynsha jaǵdaı jasaýymyz kerek. Men bilim berý salasyna aıryqsha mán beremin. Prezıdent retinde qabyldaǵan alǵashqy sheshimderimniń biri de ustazdarǵa qatysty boldy», dedi Qasym-Jomart Toqaev.
Prezıdent jahandaný dáýirinde bilim men ǵylym eldiń bolashaǵyn aıqyndaıtynyn aıtyp, óskeleń urpaqqa sapaly bilim berýdiń mańyzyn erekshe atap ótti.
«Qazir – bilim men ǵylymnyń zamany. Jahandaný dáýirinde ozyq bilimdi ıgergen, jańa tehnologııany meńgergen eldiń upaıy túgel bolady. Búgin sanaly urpaq tárbıeleı alsaq, erteń zaman kóshiniń basynda júremiz. Sondyqtan osy salany qoldaý memlekettik saıasattyń negizgi basymdyǵy bolyp qala beredi», deıdi Prezıdent.
Memleket basshysynyń aıtýynsha, sońǵy jyldary bul baǵytta aýqymdy jumys atqaryldy. 2019 jyldan beri bilim salasynyń bıýdjeti úsh ese artty. Osy ýaqytta 1 mıllıonnan astam oqýshyǵa arnalǵan 1200 mektep ashyldy. «Keleshek mektepteri» ulttyq jobasy aıasynda jalpy sany 217 mektep qurylysy josparlandy. Qazir 128 mektep salyndy. Budan bólek, Bilim berý ınfraqurylymyn qoldaý qorynyń qarjysyna alpystan astam mektep salyndy. Taǵy 30-ǵa jýyǵy salynyp jatyr.
Sonymen qatar «Pedagog mártebesi týraly» arnaıy zań qabyldandy. «Qazaqstannyń eńbek sińirgen ustazy» ataǵy belgilendi. Búginde 74 muǵalim osy qurmetti ataqqa ıe boldy. Byltyr 2 ustaz «Qazaqstannyń Eńbek eri» atandy.
«Muǵalimderdiń áleýmettik jaǵdaıyn jaqsartý árdaıym basty nazarda. Sońǵy tórt jyldyń ishinde olardyń jalaqysy 2 ese ósti. Qazirgi tańda 500 myńnan astam ustazǵa ústeme aqy tólenedi. «Bilim berýdegi ózgeristerdiń myń kóshbasshysy» jobasy qolǵa alyndy. Osy jobaǵa qatysqan 332 maman mektep dırektory bolyp taǵaıyndaldy. Muǵalimder óz mindetine kirmeıtin artyq jumystan bosatyldy. Ustazdyń nazary bala oqytý isinde bolýǵa tıis», deıdi el Prezıdenti.
