Sýretti túsirgen – Qasıet Muhtarov
Buqar jyraý atyndaǵy ádebıet jáne óner mýzeıiniń uıymdastyrýymen tulǵanyń 100 jyldyǵyna oraı bilim uıasynyń ǵımaratyna memorıaldyq taqta ilindi.
Is-sharaǵa kınorejısserdiń qyzy, tarıh ǵylymdarynyń doktory, professor, shyǵystanýshy ǵalym Merýert Ábýseıitova, oblys ákiminiń orynbasary Aıgúl Málikova qatysty.
– Ákem jan-jaqty, segiz qyrly adam boldy. Ánshiligi bir basyna, ózi bastap 1000-ǵa jýyq fılmdi qazaq tiline aýdarǵan. Týǵan jerin janyndaı súıdi, Baıanaýyl baýraıynda qazaqtyń iri tulǵalary týraly derekti fılmder túsirdi. Jyl saıyn Baıanaýylǵa bárimizdi alyp kelip, eń áýeli ǵulama Máshhúr Júsiptiń zıratyna táý etetinbiz. Máshekeń áýlıe adam bolǵan ǵoı, ákemiz ben inisi Sýattyń esimin sol kisi qoıǵan eken. Negizi ákemizdiń ákesi – Áýezbek, ol kisi únemi jumysbasty bolyp aǵasy Áshirbek baýyryna basqan. Sóıtip biz Áshirbek atanyń nemereleri bolyp kettik, – dep áńgimeledi Merýert Qýatqyzy.
Qýat Ábýseıitov jary Maıra Bekjumanqyzy ekeýi úsh bala tárbıelep ósirgen. Kenjesi Qaırat Ábýseıitov dıplomat, kóp jyl shet memleketterde elshi bolyp jumys istedi. Qazir de atalǵan salada eńbek etip júr.
Aıtyp óteıik, Qýat Áshirbekuly – Qazaq KSR eńbek sińirgen mádenıet qaıratkeri (1975). Almaty kınoakterler mektebin (1947), Búkilodaqtyq memlekettik kıno ınstıtýtyn (1958, G. Roshal men S. Iýtkevıchtiń sheberhanasynda) támamdaǵan.
Mektepte oqyp júrip, jergilikti qazaq teatrynyń sahnasyna shyǵyp, negizgi trýppaǵa qabyldanǵan. Odan soń Kınoakterler mektebinde oqı júrip, Almaty kórkem jáne hronıkalyq-derekti fılmder stýdııasynyń kınoaýdarma bóliminde jumys istedi. 1990 jyly «Aıtýar» atty derekti fılmder túsiretin stýdııa ashty. «Syr sandyq» atty estelikter kitaby jaryq kórgen.
Pavlodar oblysy
