foto: polisia.kz
Bes memleketpen shektesetin Qazaqstan dostyq pen ózara tatýlyqtyń aıqyn úlgisin kórsetip keledi. 15 myń shaqyrymnan asatyn keń shekara boıynda antyna adal, rýhy bıik shekarashylar kún-tún demeı qyzmet atqaryp júr. Táýelsizdik jyldarynda qalyptasqan bul qyraǵy qyzmet zaman talabyna saı jetilip, jyldan-jylǵa nyǵaıyp, aýqymyn keńeıtip keledi.
Elimiz táýelsiz bolǵan 1991 jyldyń jeltoqsanynan keıin irgeli memlekettiń shekarasyn kúzetý kún tártibine qoıyldy. Osy maqsatty júzege asyrý úshin 1992 jyldyń 18 tamyzynda Qazaqstan Respýblıkasy UQK Shekara qyzmeti quryldy. Alaıda aıtýly data Qazaqstannyń memlekettik merekeler kúntizbesine 2012 jylǵy 29 tamyzda ǵana engizildi.
Elimiz Reseı, Qytaı, Qyrǵyzstan, О́zbekstan jáne Túrikmenstanmen shektesedi. Respýblıkanyń qurlyqtaǵy memlekettik shekarasynyń jalpy uzyndyǵy – 13 402 km, sý shekarasy – 1730 km.
Shekarashylardyń basty mindeti – memlekettik shekarany zańsyz kesip ótpek bolǵandarǵa tosqaýyl qoıý, el aýmaǵyna qaýip tóndiretin kez kelgen árekettiń aldyn alý. Bul jaýapkershilikti abyroımen atqaryp júrgen jas mamandardyń erligi – Qazaqstan qaýipsizdiginiń basty kepili.
