Álem nazaryndaǵy kezdesý
Juma kúni Alıaskada Reseı prezıdenti Vladımır Pýtınmen kezdesken soń, Tramp Kıevke beıbit kelisimge kelýge yqpal etýdi qolǵa alǵan. Aq úı habarlaýynsha, aldymen Tramp pen Zelenskıı Oval kabınette jeke júzdesedi. Odan keıin barlyq eýropalyq kóshbasshylar Shyǵys zalynda bas qosyp, Ýkraınaǵa qatysty ortaq ustanymdaryn talqylaıdy.
Eýropa elderi bul kezdesýge aıryqsha mán berip otyr. О́ıtkeni Pýtınmen ótken sammıtke qatyspaǵandyqtan, olar Ýkraına taǵdyry syrttarynan sheshilip ketpeı me dep alańdaıdy.
Germanııa Syrtqy ister mınıstri Iohann Vadepfýl: «Álem kóz tigip otyrǵan sát – osy. Bul Vashıngtondaǵy aqıqat kezeńi», dedi.
Ýkraına ýáji
Zelenskıı Reseıdiń Donbastyń qalǵan bóliginen bas tartý sekildi talaptaryn qabyldaýdan úzildi-kesildi bas tartyp otyr. Ol qazirdiń ózinde atysty dereý toqtatý arqyly tereń beıbit kelissózder bastaýǵa úndeıdi. Biraq Tramp Pýtınniń ustanymyna jaqyndap, birden aýqymdy kelisim jasaý jolyn qoldaı bastaǵany baıqalady.
Zelenskıı Vashıngtonǵa keshkisin jetken soń Telegram arqyly úndeý jasap:
«Biz bárimiz soǵystyń tez ári senimdi toqtaýyn qalaımyz. Bul soǵysty bastaǵan – Reseı. Amerıka men eýropalyq dostarymyzben birge kúsh biriktirip, Máskeýdi shynaıy beıbit kelisimge keltiremiz dep senemin», dedi.
Sonymen Vashıngtondaǵy bul kezdesý – Ýkraına soǵysynyń taǵdyryn aıqyndaıtyn sheshýshi kezeńniń biri. Tramptyń «Qyrymnan bas tartý» jáne «NATO-dan alystaý» tárizdi talaptary Kıev úshin aýyr synaq bolyp tur. Al Zelenskıı óz eliniń táýelsizdigi men qaýipsizdigin saqtaý jolynda Batystyń qoldaýyna arqa súıeýge tyrysady.
