Foto: Májilistiń baspasóz qyzmeti
Jalpy aýmaǵy 9 myń sharshy metrdi quraıtyn jáne quny 3,2 mlrd teńge bolatyn jańa ortalyqta turǵyn bólmeler, jeke jáne toptyq ońaltý sabaqtaryna arnalǵan kabınetter, emdik dene shynyqtyrý zaly, psıholog, psıhıatr, nevrolog, logoped kabınetteri, fızıoterapııa blogy jáne ashana qarastyrylǵan. Sonymen qatar munda 3 pen 18 jas aralyǵyndaǵy tirek-qımyl apparaty buzylǵan 50 balaǵa qyzmet kórsetilip, jartylaı stasıonarda kúndizgi bólimge osy aýmaqqa jaqyn aýdandardan 30 bala qabyldanatyn bolady.
Erlan Ábdıev ǵımarat ishin aralap kórip, áleýmettik-turmystyq ortaǵa beıimdeý, sýret salý, sensorlyq jabdyqtar, kompıýterlik synyp, kitaphana, emdik-dene shynyqtyrý, akvabólme, Montessorı bólmeleri men akt jáne sport zaldary, ashananyń jabdyqtalý jaǵdaıymen tanysty. Munda ıppoterapııa ádisimen emdeýde Ońtústik Koreıadan mehanıkalyq at jabdyǵy alynǵan. Elektrondy jabdyq ár eki mınýt saıyn túrli jattyǵý formalaryna enedi. Jalpy ıppoterapııanyń 10 túrli ádisi qoldanylady.
Ońaltý ortalyǵy Qazaqstan Respýblıkasy Konstıtýsııasynyń 30 jyldyǵy merekesi qarsańynda ashylady.
«Biz «kedergisiz orta» týraly aıtqanda, bul abstraktili uǵym emes, adamdardyń ómirin dál qazir ózgertetin naqty sheshimder ekenin túsinýimiz qajet. Orańǵaıdaǵy ońaltý ortalyqtary – «AMANAT» partııasynyń saılaýaldy ýádeleriniń is júzinde oryndalyp jatqanynyń aıqyn dáleli. Erekshe kútimdi qajet etetin balalardyń ata-analary úshin bul – perzentiniń kásibı kómek alyp, tolyqqandy ómirge qadam basýyna degen senim. Eresekter úshin – qoǵamnan shet qalmaı, belsendi ómir súrýine múmkindik beretin qoldaý. Aldaǵy ýaqytta da múmkindigi shekteýli azamattardyń quqyqtaryn qorǵaýdy jalǵastyryp, qabyldanatyn árbir zań men baǵdarlamada olardyń múddesi men qajettiliginiń eskerilýin qamtamasyz etemiz», dedi Erlan Ábdıev.
Bul baǵyttaǵy jumys júıeli túrde júrgizilip jatyr. Búginde «AMANAT» partııasynyń saılaýaldy baǵdarlamasyn júzege asyrý boıynsha elimizde erekshe bilim berýdi qajet etetin 16,9 myń balany qamtıtyn 1,8 myń ınklıýzııa kabıneti, sondaı-aq 5,5 myń balany qamtıtyn 688 beıimdelgen sport seksııasy jumys isteıdi. Partııa sondaı-aq jumys oryndaryna kvotalardyń oryndalýyn jáne ınfraqurylymnyń qoljetimdiligin arttyrýdy talap etedi.
Aıta keteıik, ótken jyly Májiliste múmkindigi shekteýli adamdardyń quqyqtary men múddelerin qorǵaý baǵytynda eleýli jumys atqarylǵan. Jıyrmaǵa jýyq depýtatty biriktiretin «Inklıýzıvti Parlament» toby barlyq zań jobasyn osy sanattaǵy azamattardyń quqyqtary men múddelerin eskere otyryp qarastyrady. Depýtattardyń bastamasymen turǵyn úı zańnamasyna I jáne II toptaǵy múgedektigi bar azamattarǵa, sondaı-aq múgedek balalary bar otbasylarǵa baspanany birinshi kezekte alý quqyǵyn bekitetin normalar engizildi. Halyq qalaýlylarynyń qoldaýymen joǵary oqý oryndaryna múmkindigi shekteýli azamattardy qabyldaý kvotasy 1 paıyzdan 2 paıyzǵa deıin ulǵaıtylǵan.
