Qaıǵyly jaǵdaı 18 tamyzǵa qaraǵan túni bolǵan. Skoda avtokóliginiń júrgizýshisi eskertý belgilerin baıqamaı, jol jóndeý jumystaryn atqaryp jatqan jumysshylardy qaqqan. Oqıǵa kezinde ekinshi jumysshy jeńil jaraqat alyp, dárigerlik tekseristen soń úıine jiberildi.
Astana qalalyq Polısııa departamentiniń baspasóz qyzmetiniń jetekshisi Elmıra Shaýlenova resmı túsinikteme berdi.
– 2025 jylǵy 18 tamyzda túngi ýaqytta Skoda markaly kóliktiń júrgizýshisi Saraıshyq kópirinde jol jóndeý jumystary júrgizilip jatqanyn eskermeı, eki jumysshyny qaqty. Nátıjesinde bir jumysshy oqıǵa ornynda qaza tapty, ekinshisi aýrýhanaǵa jetkizildi. Qylmystyq is qozǵaldy, – dedi ol.
Qaza tapqan jumysshynyń artynda kámeletke tolmaǵan eki balasy qalǵan. Jóndeý jumystaryna jaýapty kompanııa ókilderi marqumnyń otbasyna qoldaý kórsetiletinin aıtty.
– Bul ýchaskede túngi mezgilde ıamalyq jóndeý júrgizildi. Barlyq eskertý belgileri qoıylyp, jumysshylar arnaıy kıimde bolǵan. Júrgizýshi jol erejesin saqtamaǵan. Atalǵan jumystardy merdigerdiń sýbmerdiger uıymy – «Zangar-Astana» JShS atqardy, – dedi jobanyń jetekshisi Aıan Karımov.
Qazirgi tańda jol-kólik oqıǵasyna qatysty sotqa deıingi tergeý amaldary bastaldy. Júrgizýshiniń kóligi aıyppul turaǵyna qoıyldy.
