2019 jyldan bastap elimizde mektepke deıingi bilim berý salasyn reformalaý boıynsha júıeli jumys júrgizilip keledi. Onyń maqsaty – qoljetimdilikti, sapany jáne ashyqtyqty arttyrý. Memlekettik saıasattyń basym baǵyttarynyń biri – ár balanyń sapaly mektepke deıingi tárbıe men bilim alý quqyǵyn qamtamasyz etý.
Eger 2019 jyly elimizde 10,5 myń mektepke deıingi uıym jumys istep, onda 892 myń bala tárbıelense, 2025 jylǵa qaraı olardyń sany 11,8 myńǵa jetip, 1 mıllıonnan astam bala qamtyldy. Sonymen qatar shaǵyn ortalyqtardan turaqty materıaldyq-tehnıkalyq bazasy bar tolyqqandy balabaqshalarǵa kóshý júzege asyryldy.
Kezek máselesinde de aıtarlyqtaı ózgerister bar. 2019 jyly balabaqshaǵa kezekte 446 176 bala tursa, 2025 jyly 2 jastan 6 jasqa deıingi balalar arasynda bul kórsetkish 84 myńǵa deıin azaıdy. Osylaısha, alty jylda kezekte turǵandar sany shamamen 5 ese qysqardy.
Mundaı nátıjege mektepke deıingi uıymdar jelisin júıeli keńeıtý, oryndardy bólýge jańa tásilderdi engizý jáne vaýcherlik qarjylandyrý sııaqty úderisterdi sıfrlandyrý arqyly qol jetkizildi. Bul tetik qyzmetterdiń qoljetimdiligi men sapasyn arttyryp qana qoımaı, mektepke deıingi bilim berý salasyndaǵy ashyqtyqty qamtamasyz etedi.
Búginde joba elimizdiń 20 qalasy men 7 aýdanynda júzege asyrylyp otyr. Qanatqaqty joba iske asyrylǵan ýaqyt ishinde balabaqshaǵa kezek taǵy da 44%-ǵa qysqardy. Nátıjesinde, 7,7 mlrd teńgeden astam bıýdjet qarjysy únemdeldi.
Manar ADAMOVA,
Oqý-aǵartý mınıstrligi Mektepke deıingi bilim departamentiniń dırektory
