Foto: rail-news.kz
Premer-mınıstr Kólik mınıstri Nurlan Saýranbaevtan 125 temirjol vokzalyn rekonstrýksııalaý men jańǵyrtý jumystary qalaı júrip jatqanyn jáne qashan aıaqtalatynyn surady.
«Sizdiń tapsyrmańyz boıynsha jumystar bastaldy. Bıyl 100 vokzal boıynsha jumystar aıaqtalady. Qalǵandary 2026 jyly bitedi», dep baıandady Nurlan Saýranbaev.
Mınıstrlik málimetinshe, merdigerler temirjol vokzaldaryn rekonstrýksııalaý jáne jańǵyrtý jumystaryna kirisken, jobalardy júzege asyrý bekitilgen normatıvtik-tehnıkalyq merzimderge sáıkes kezeń-kezeńmen júrgizilip jatyr.
Jańǵyrtý vokzal keshenderiniń negizgi elementterin, sonyń ishinde qasbetterdi, shatyrdy, úı-jaılardy, ınjenerlik jelilerdi, jolaýshylar zaldary men platformalardy qamtıdy. Qazirgi zamanǵy qaýipsizdik, navıgasııa jáne jaryqtandyrý júıelerin ornatý, sondaı-aq mobıldiligi tómen jolaýshylar úshin jaǵdaı jasaý kózdelgen.
Oljas Bektenov bul baǵyttaǵy jumystardy jedeldetýdi tapsyrdy.
