Foto: Ashyq derekkóz
Qarajatty maqsatsyz paıdalanýǵa qatysty jáne sybaılas jemqorlyqqa qarsy kúres jónindegi suraqqa jaýap bere otyryp, Nurlan Saýranbaev temirjoldaǵy iri jobalardy júzege asyrý sıfrlyq teńgege aýystyrylǵanyn habarlady. Mundaǵy qarjylandyrýdyń búkil prosesin Ulttyq bank retteıdi. Sondyqtan da bul qarajatty naqty maqsatyna sáıkes jumsaýǵa múmkindik beredi.
«Avtojoldarǵa keletin bolsaq, biz Pavlodar men Atyraýda eki joba boıynsha osyndaı pılottyq jobany bastadyq. Qazirdiń ózinde baǵa aıyrmashylyǵyn sezinip otyrmyz. Biz avtojoldar boıynsha barlyq jobalardy sıfrlyq teńge arqyly júzege asyratyn bolamyz. Osyndaı baqylaýdyń arqasynda aqsha maqsatsyz jumsalmaıtyn bolady», dep atap ótti mınıstr.
Spıker osy júıeniń arqasynda qarajatty aýdarýdyń barlyq prosesi ashyq jáne baqylaý ońaı bolatynyn túsindirdi. Memlekettik kirister komıtetimen birlesip munyń bári qatań baqylanady.
«Sıfrlyq teńge» degenimiz, bul – úlken baǵdarlama. Premer-mınıstr tıisti jıyn ótkizip, tapsyrma berdi. Pılottyq baǵdarlama iske qosyldy. Jol kartasy boıynsha merzimder belgilendi. Biz qurylys jumystary sıfrlyq teńge arqyly júzege asyrylýy tıis degen shart qoıamyz. Bul basqa jerge aqy tóleýge múmkindik bermeıtin júz paıyz ashyqtyqty qamtamasyz etedi», dep atap ótti N.Saýranbaev.
