«Avangard zaýyty» seriktestigi – elimizdegi tabaq shynyny óńdeý jáne shyny paketter óndirý salasyndaǵy jetekshi kásiporynnyń biri. Zaýyt kásiporyn eýropalyq jabdyqtarmen jabdyqtalǵan jáne qurylys pen ónerkásipke arnalǵan joǵary sapaly ónimder shyǵarady. Olar jaryq ótkizý qabileti joǵary, soqqyǵa tózimdi ári halyqaralyq standarttarǵa tolyq sáıkes keledi.
Erjan Beısenbaev zaýyttyń tynys-tirshiligimen tanysyp, óndiris basshylyǵymen jáne qyzmetkerlerimen áńgimelesip, ózekti máselelerdi talqylady.
Sapaly ónim shyǵarýmen qatar kásiporyn birqatar qıyndyqtarǵa da tap bolyp otyr. Ásirese, elektr energııasynyń tarıfynyń qymbattyǵy, eksportqa shyǵarý kezinde taýarlardy shekarada ótkizý pýnkteri kóp ustap qalý máseleleri bar ekeni aıtyldy.
Májilis depýtaty zaýyt basshylyǵy kótergen máselelerdi muqııat tyńdap, olardy quzyrly memlekettik organdarmen birge qarastyratynyn aıtty.
«Elektr energııasy tarıfiniń qymbattaýy, stanoktardy satyp alǵanda ony shyǵyn retinde kórsete almaý jáne soǵan da qosymsha qun salyǵyn tóleý, sondaı-aq eksportqa shyǵarý kezinde shekarada ónimniń kóp ustalyp qalýy – bul kásiporyn úshin eleýli qıyndyqtar. Olardy sheshý úshin quzyrly organdarmen birge sizderge kómektesýge tyrysamyz. Sonymen qatar, zaýytqa jastardy kóbirek tartý da mańyzdy. Meniń basty maqsatym – óńirdegi kásipkerlerdiń máselesin kórip, usynystaryn tyńdap, Májilis deńgeıinde qarastyrý», dedi E.Beısenbaev.
