Bıyl forým shyǵarmashyl jastar arasyndaǵy sıfrlyq jáne ınnovasııalyq yntymaqtastyqty damytýǵa arnaldy.
Jıyn qos halyqtyń tarıhy men mádenıetin zertteýdegi Shoqan Ýálıhanovtyń eńbegi týraly «Chokan Valıhanov: taryhtyn jaryk jyldyzy» atty derekti fılminiń tusaýkeserinen bastaldy.
Is-sharaǵa Qazaqstan Respýblıkasynyń Mádenıet jáne aqparat mınıstri Aıda Balaeva, Qyrǵyz Respýblıkasynyń Memlekettik hatshysy Marat Imanqulov, sondaı-aq eki eldiń mádenıet, ǵylym jáne shyǵarmashylyq salasynyń ókilderi men zııaly qaýym qatysty.
Aıda Balaeva Shoqan Ýálıhanov eńbekteriniń qazaq-qyrǵyz tarıhyndaǵy ornyn erekshe atap ótti.
«Álemge áıgili «Manas» dastany qyrǵyz ultynyń boıtumary bolsa, ony alǵash ret qaǵazǵa túsirip, kópke nasıhattaýda Shoqan Ýálıhanovtyń eńbegi zor. Sondaı-aq onyń «Ystyqkól kúndeligin» – qazaq-qyrǵyz birliginiń ǵylym men rýhanııattaǵy jarqyn kórinisi. Qyrǵyz baýyrlarymyz túsirgen búgingi «Chokan Valıhanov: taryhtyn jaryk jyldyzy» derekti fılmi tarıhı ári mádenı qundylyǵy zor, maǵynaly týyndy bolady dep senemin», - dedi mınıstr.
Qyrǵyz Respýblıkasynyń Memlekettik hatshysy Marat Imanqulov eki elge ortaq tarıhı tulǵalardyń mańyzyna toqtaldy.
«Qyrǵyzstan men Qazaqstan tarıhynda Abaı Qunanbaev, Shoqan Ýálıhanov, Jambyl Jabaev, Muhtar Áýezov, Shyńǵys Aıtmatov syndy uly tulǵalar bar. Olar mádenı jáne rýhanı dástúrler arqyly qos halyqtyń birligi men baýyrlastyǵyna zor úles qosty. Dál osy qaıratkerler búgingi jastarǵa shabyt berip, olardy jasampazdyq jolyn jalǵastyrýǵa jetelep keledi», – dedi ol.
Forým aıasynda Qazaqstan Respýblıkasynyń Mádenıet jáne aqparat mınıstri Aıda Balaeva Qyrǵyz Respýblıkasynyń mádenıet, aqparat jáne jastar saıasaty mınıstri Mırbek Mambetalıevpen kezdesip, mádenı-gýmanıtarlyq áriptestikti damytý máselelerin talqylady.
Budan bólek, forým kretıvti ındýstrııa men sıfrlandyrý máselelerine nazar aýdardy. «Jańa býyn AI-startaptary: jergilikti ıdeıadan jahandyq naryqqa» jáne «Ed-tech jobalary: jańa syn-qaterler» taqyryptarynda paneldik sessııalar ótkizildi. Oǵan 300-den astam jas IT-kásipkerler, startapshylar, baǵdarlamashylar, blogerler men medıa mamandar qatysty.
Memleket basshysynyń Qyrǵyz Respýblıkasyna resmı sapary aıasynda Bishkekte Qazaqstannyń mádenıet kúnderi ótkizilýde. Onyń aıasynda «Qazaqstan kınosy kúnderi» uıymdastyrylyp, Nurǵısa Tilendıevtiń 100 jyldyǵyna arnalǵan merekelik konsert usynyldy.
