Qarýly kúshterdiń polkovnık shenindegi ardageri Slanbek Dosybaev osy kúni Baıqońyr aýdanyndaǵy Belsendi uzaq ómir súrý ortalyǵynyń belsendi múshesi. Zeınet jasyna shyqsa da, Abaıdyń qarasózderi men Muhtar Áýezovtiń shyǵarmalaryn jastarmen birge taldap, áli de «shákirttik» ómirin jalǵastyryp keledi.
«Shildeniń 31-i kúni elordadan «Qaıdasyń, Qaraýyltóbe?» dep jolǵa shyqtym. Arqa dalasynyń samaly betke uryp, tańǵy salqynmen shyqqan sapar ońaı bolǵan joq. Kún ystyq, keıde jel qarsy soǵady, keıde jańbyr jaýyp, joldy aýyrlatady. Biraq toqtamadym. Jolda dám-tuzyn usynǵan jomart jandardyń qonaqjaılyǵyn kórdim. Besqaraǵaıda meshit ımamy qarsy alyp, qonaq qyldy. Pavlodarda Máshhúr Júsip meshitinde boldym. Qasqabulaqtaǵy jaısań jigitter qoıyn soıyp, dastarqan jaıyp kútip aldy. Sol kúni Aıbar Erkin degen baýyrymyzben tanystym. Ol da Qytaıdan velosıpedpen 2600 shaqyrym joldy artqa tastap kelip otyr eken. Osylaısha, jeti kún ótkende 6 tamyzda Semeıge jettim», deıdi ol.
Oıly-qyrly, tóbe-adyry kóp dala jolymen jalǵyz jortqan jolaýshy bul sapardy jaı ǵana saıahat dep sanamaıdy.
«Alys jolǵa kólikpen qalaı tez jetseń, dál solaı áseri de tez umytylady. Al men bul saparǵa eki aı buryn daıyndalyp, hakimniń óleńderi men qarasózderin, Muhtar Áýezovtiń «Abaı joly» epopeıasyn tolyq oqyp shyqtym. Minekı, osylaısha jeti kúndik sapar barysynda shyǵarmalardy oısha qorytyp, sondaǵy tarıhı jerlerdi kórip, bólek áser aldym», deıdi Slanbek Dosybaev.
