Býrabaıdyń baýyrynda ósip, bala jastan ólkeniń tynysyn, kıesin tanyǵan Murattyń ázirge ózge qalaǵa baryp jumys istegisi joq. Ol týǵan Aqylbaı aýyly osy Býrabaı aýdanyna qaraıdy. Orta mekteptiń 9-synybyn támamdaǵan soń, Shýchınsk qalasyndaǵy tehnıkalyq kolledjde elektrık mamandyǵyna bilim aldy. Oqyp júrgende qoǵamǵa, týǵan ólkege paıdasy tıetin kásibı maman bolýdy armandady. Murat búginde «Býrabaı damý» seriktestiginde jumys isteıdi. Týrısterdiń qarasy úzilmeıtin tabıǵaty tańǵajaıyp kýrortty aımaqtyń bir bóligin jaryqpen qamtamasyz etedi. Naqtylap aıtsaq, seriktestikke qarasty Abylaı han alańy, vızıt ortalyǵy, «Burabayland» oıyn-saýyq parki, «Aqbýryl» syndy birneshe nysannyń elektr qýatyna baılanysty týyndaǵan aqaýlaryn der kezinde retteıdi.
«Býrabaı damý» seriktestiginde eki jyldan astam ýaqyt jumys istep kelemin. Kolledjdi támamdaǵan soń, top jetekshisiniń usynysymen birden osynda ornalastym. Ol kezde eńbek tájirıbem az edi, aǵa býyn áriptesterden úırenerim kóp boldy. Toqpen jumys isteýge bala jastan qyzyǵamyn. Jalpy, biz sekildi jastarǵa táýir jalaqy usynatyn jumys kóp. Kelgen jyly aıyna 170 myń teńge jalaqy alsam, qazir tabysym 300 myń teńgege jetti. Biletin adamǵa meniń mamandyǵym qıyn emes. Qıyn emes eken dep, qaýipsizdik sharalaryn saqtamasqa taǵy bolmaıdy. Mysaly, búgin velojolaqqa jaryq túsiretin elektrli baǵandardy tekserýge shyqtym. Munda da saq qımyldamasaq, qaýip-qater taban astynda», deıdi Murat.
On segizinde jaspyn demeı, birden mamandyǵy boıynsha jumysqa kirisken M.Tabataevtyń búginde biliktiligin rastaıtyn qujaty bar. Qazir ol 3-razrıadty elektrık. 4-, 5-razrıadty elektrık sanatyn alýǵa joǵary bilim qajet eken. Murattyń keleshekte energoaýdıtor mamandyǵy boıynsha joǵary bilim alý oıynda bar. Oǵan deıin taǵy birer jyl ósken ólkege qyzmet etýdi perzenttik paryzy sanaıdy.
