«Biz 1998 jyly konkýrsqa qatysyp, saıabaqty menshigimizge aldyq. Ol kezde munda 5 attraksıon ǵana bar edi. Saıabaqta qorshaý, jaryq joq, alleıada sýsyǵan qum jatatyn. Qıyn kezeń edi ǵoı. Qysqasy, saıabaq eshkimge kereksiz kúıde qalǵan. Ol jyldary ıeligimde jastyq shyǵaratyn seh bar edi. Sol sehty saýdalap, osy saıabaqty aldyq. Qarajat tapshy kezde qıynshylyqty kóp kórdik. Munda tipti dárethana da bolmady. Jumysshylar ázil-shynyn aralastyryp: «Eger siz dárethana salsańyz, sizge eskertkish qoıamyz», dedi. Sizge ótirik, maǵan shyn, dárethananyń máselesin aıtyp, sol kezdegi ákim Bolat Jylqyshıevqa bardym. Ol kisi: «Durys másele kóterip otyrsyz. Tek zań aıasynda isteńiz», dedi. Al zań ruqsat bermeıdi. Sol jyldary qoǵamdyq orynda dárethana degenińiz jer astynda bolýy kerek eken. Máseleniń ýshyǵyp turǵanyn ákimge qaıta jetkizgen soń ǵana ruqsat aldym», deıdi ortalyq saıabaqtyń ıesi Asan Qoshmambetov sol jyldary týyndaǵan qıyndyqtardy eske alyp.
Qazir qarasańyz, Turar Rysqulov atyndaǵy saıabaq totydaı taranyp tur. Mundaǵy janǵa jaıly atmosfera barshany ózine shaqyryp turatyndaı kórinedi. Bıik taldardyń saıasynda tynyǵýdy qalaǵan jurt osy jaqqa aǵylyp jatady. Ondaǵan attraksıonǵa qyzyqqan jurt balalaryn osynda ákeledi. Jumysshylar saıabaqtyń sánin keltirý jolynda ala tańnan qara keshke deıin tynymsyz eńbek etip jatyr.
«Ieligimizge alǵan jyly saıabaqta taldar qýrap jatty. Aıtyp-aıtpaı ne kerek, jedel iske kiristik. 6–8 jasar eki qyzym 5–10 santımetr saıyn tal kóshetin ekti. Olarǵa bul jumys ońaı soqqan joq. Qyzdarym: «Áke, eldiń balalary oınap júr ǵoı», deıtin. Qyna aǵashtyń ornyna malba otyrǵyzdyq. Aıtsań, maqtanǵandaı bolasyń. Degenmen el aýmaǵyndaǵy kóptegen saıabaqty aralap kórdik. Sonda san túrli attraksıony eń kóp, túrli taly men gúli jaıqalyp turǵan saıabaq bizdiki ekenine kózimiz anyq jetti. Sondyqtan 30 jylǵa jýyq ýaqyt boıy atqarǵan eńbegimizben maqtanýǵa bolatyn sekildi. Barymyzdy osy saıabaqqa saldyq», deıdi Asan Qoshmambetovtiń jary Aıdına Nurlybekqyzy.
Saıabaqtaǵy sýsyǵan qumnan aspanǵa kóterilgen shań jurttyń mazasyn ketiretin. 90-jyldary kelgen jurt piste shaǵyp, demalys ornyn qoqysqa toltyratyn. Sol olqylyqpen kúresý maqsatynda saıabaq basshysy aýmaqty qorshaýǵa bel býdy. Qolǵa alǵan isti sátimen aıaqtady. Áýeli munda bar bolǵany 5 attraksıon ornalassa, A.Qoshmambetov saıabaqty menshigine alǵan soń, mundaǵy átkenshekter men attraksıondar sany qyryqtan asypty.
«Saıabaq ishinde salynǵan daladaǵy sahnany kelýshilerge tegin beremiz. Munda 702 oryn bar. Sırk kelse de, konsert qoıamyz degen ánshilerge de tegin usynamyz. Tek tazalyqpen aınalysatyn azamattarǵa tıesili aqyny tólese bolǵany. Sahnany áıgili Iýrmaladaǵy joba negizinde jasadyq. Onda 1 500 oryndyq bolsa, bizdiń saıabaqtaǵy sahnada 702 oryn bar. Aıyrmashylyq sol ǵana. Munda sebezgi bólmesi de, dárethana da bar. 100 adamǵa arnalǵan kıim aýystyrý bólmesi de qarastyrylǵan», deıdi A.Qoshmambetov.
Táýelsizdiktiń alǵashqy jyldarynda qandaı da bir isti bastaýdyń mashaqaty kóp edi. Odan bólek, saıabaqtaǵy qyzmetkerlerdiń jalaqysyn ýaqtyly óteý de ońaı sharýa emes. Tabys tabý jolynda ýaqyt suranysyna saı isker bolýyń kerek. Jumysshylarǵa jaqsy eńbekaqy tóleý úshin saıabaq basshysy jańa qadamǵa barýdy jón dep tapqan. Ol qyzmetkerlerimen aqyldasa kele, «kúlki bólmesine» qajetti «qısyq aına» shyǵarýǵa táýekel etipti. Osylaısha, tabysty eseleýge den qoıǵan menedjer A.Qoshmambetov keıinnen artyna shaǵyn vagondar tirkelgen traktor qurastyryp, ony da naryqqa shyǵarypty.
Qıyn-qystaý kezeńde A.Qoshmambetovtiń otbasy úshin nesıe alý da ońaıǵa soqpady. Zaıyby Aıdına Nurlybekqyzynyń aıtýynsha, áýeli analaryna tıesili úıdi kepilge qoıyp, attraksıon alypty. Keıinnen sol attraksıondardy taǵy da kepilge qoıyp, jańa attraksıondar alý arqyly saıabaqqa kelýshilerdiń sanyn arttyrǵan. Osylaısha, ár eki-úsh jyl saıyn saıabaqty túrlendirip otyrǵan. Sapaǵa mán bergen basshylyq barlyq qıyndyqqa qaramastan, baǵasy 100 myń dollardan asatyn reseılik átkenshekterdi ákelip júrdi. Aıtýlarynsha, tek bir ǵana attraksıon Qytaıdiki eken.
«Alǵan attraksıondardyń eń qymbatynyń baǵasyn 50 mıllıon dep esepteıikshi. Ol kezde bılettiń baǵasy – 200–300 teńge. Shyǵyndy qaıtarý úshin qansha adam kelýi kerek? Attraksıon óz-ózin múlde aqtamaıdy. О́ıtkeni halyq maýsym-qyrkúıek aralyǵynda ǵana keledi. Sondyqtan qyzmetkerlermen ashyq dıalog ornattym. Tabys artqan kezde olar da kóp tabys tapty. Qansha qarajat túskenin ózderi eseptep, elektrıkke qansha jalaqy, basqaǵa qansha aılyq tóleıtinimizdi solar sheshti. Bıýdjetti ózderi rettegen soń, maǵan aılyq tóleý máselesi jeńil boldy. Jumysshylardyń aldynda adal bolǵanymnan utylǵan joqpyn. Olar maǵan qaı kezde de senim artady.
Ashyqtyq degenimiz sol, ózime kólik alý úshin de qyzmetkerler-den ruqsat suradym. О́ıtkeni pandemııa kezinde kóligimdi satyp, jaıaý qalǵan edim. Olarǵa ashyq bolsań, qurmetteseń, qyzmetkerler de seni qadirleıdi. Jumysqa kele jatqanymda qyzmetkerlerim qandaı talap qoıady dep qaımyǵyp otyramyn. Basshy jumysshylarymen esepteskende ǵana jumys júıeli júredi», deıdi A.Qoshmambetov.
Qazirde Turar Rysqulov atyndaǵy saıabaqqa kelýshiler sany az emes. Ásirese baldyrǵandar mundaǵy «Aımer» aspaly arqandy attraksıonyna qatty qyzyǵady. Sondaı-aq «Rollglider», «Manej», «Petýshok», «Gıngant» attraksıondary men saıabaq ishindegi túrli úıirme balalardy ózine shaqyryp turady. A.Qoshmambetovtiń óz qolynan shyqqan túrli buıym da baldyrǵandardy qyzyqtyrady.
Qalaı desek te, táýekelge bel býyp, tozǵan saıabaqty ıeligine alyp, túletýge, túrlendirýge nıet etken A.Qoshmambetovtiń iskerligi kópke úlgi. Búginde saıabaq basshysy 32 adamdy turaqty jumyspen qamtyp otyr. Saıabaqqa kelýshiler sany artqan jaz mezgilinde taǵy da qosymsha qyzmetkerler alady. 32 adamǵa jyl on eki aı jalaqy tóleý ońaıǵa soqpasa da, isker azamat bilikti mamandardan aıyrylyp qalmaý jolynda janyn salyp eńbek etip jatyr.
TARAZ
