Fotolar: Qorǵanys mınıstrligi
Atalǵan mınıstrliktiń baspasóz qyzmetiniń málimdeýinshe Semeı qalasynda Qorǵanys mınıstri garnızondaǵy áskerı bólimderdiń basshylyq quramymen, Abaı oblysynyń ákimi Berik Ýálımen, ardagerler keńesiniń ókilderimen jáne «Semeı ınjınırıng» AQ basshylyǵymen kezdesti.
Avıasııa general-leıtenanty Dáýren Qosanov jaýyngerlik daıarlyqtyń joǵary deńgeıin saqtaý, jeke quramnyń taktıkalyq sheberligin jetildirý, áskerı tehnıkanyń jaramdylyǵyn qamtamasyz etý jáne dalalyq oqý-jattyǵýlardy odan ári damytý boıynsha naqty tapsyrmalar berdi. Áskerılerdiń áleýmettik-turmystyq jaǵdaılaryna erekshe kóńil bólindi. Atap aıtqanda tamaqtaný sapasy, jataqhana jaılylyǵy, medısınalyq qyzmet kórsetý jáne áskerı qyzmetshilerdiń otbasylaryna kórsetiletin qoldaý sharalary bar.
Mınıstr sondaı-aq áskerı qyzmetshilerdiń zamanaýı baılanys quraldarymen, ushqyshsyz ushý apparattarymen jáne sıfrlyq basqarý júıelerimen jumys isteý daıyndyǵyn kúsheıtýdi tapsyrdy. Ol jastardy Otanǵa adaldyq rýhynda tárbıeleýdiń, ardagerlermen turaqty kezdesýler ótkizýdiń, qoǵammen ashyq baılanystyń jáne mádenı-sporttyq is-sharalarǵa qatysýdyń mańyzdylyǵyn atap ótti.
Abaı oblysynyń ákimi Berik Ýálımen kezdesýde garnızondarda ornalasqan áskerı bólimderdiń ınfraqurylymyn damytý, jergilikti atqarýshy organdar men Qorǵanys mınıstrligi arasyndaǵy jumyldyrý daıyndyǵy salasyndaǵy ózara is-qımyl, sondaı-aq áskerı qyzmetshilerdiń otbasy múshelerin jumysqa ornalastyrý jáne basqa da áleýmettik kepildik máseleleri talqylandy.
Ardagerler uıymynyń ókilderimen ótken ashyq dıalog barysynda tálimgerlik, merzimdi qyzmettegi sarbazdarmen, mektep pen kolledj oqýshylarymen áskerı-patrıottyq jumys, áskerı dástúrlerdi saqtaý máseleleri qozǵaldy.
Qorǵanys mınıstri áskerı zeınetkerlerdiń áleýmettik qorǵalýy, medısınalyq qyzmeti, sanatorlyq-kýrorttyq emdelý jáne basqa da jeńildikterge qatysty suraqtaryna jaýap berdi.
Ardagerlerge arnaǵan sózinde mınıstr olardyń armııany qalyptastyrý men nyǵaıtýdaǵy erekshe rólin atap ótti.
«Sizder elimizdiń qorǵanys qabiletin nyǵaıtýǵa ólsheýsiz úles qostyńyzdar. О́mir joldaryńyz sarbazdar úshin tárbıe mektebi, qazirgi urpaq úshin úlgi. Áskerı qyzmettiń mańyzyn jáne Otandy qorǵaý qasıetti borysh ekenin jastarǵa sizderden artyq jetkize alatyn eshkim joq», dedi mınıstr.
Sapar aıasynda avıasııa general-leıtenanty Dáýren Qosanov «Semeı ınjınırıng» aksıonerlik qoǵamyna da baryp, kásiporyn basshylyǵymen kezdesti. О́ndiristik qýattarmen jáne qorǵanys pen azamattyq maqsattaǵy ónimderdi ázirleý, óndirý, jóndeý jáne qyzmet kórsetýge mamandanǵan zaýyttyń damý perspektıvalarymen tanysty. Atalǵan kásiporyn Qarýly kúshterdi qamtamasyz etýde mańyzdy ról atqarady.
