Almaty oblysynyń ákimi Amandyq Batalov Uly Otan soǵysyndaǵy Jeńistiń 70 jyldyǵyna oraı 100 ardagermen oblystyq ákimdikte saltanatty jaǵdaıda kezdesip, aıtýly merekemen quttyqtady. Sóıtip, UOS ardagerleri, UOS-qa qatysýshylarǵa teńestirilgender, soǵysta qaza bolǵandardyń jesirleri, konslagerlerde bolǵandar men tyl eńbekkerleri – barshanyń kóńilderin aýlaı bildi.
Kezdesý barysynda ardagerlerdiń barlyǵyna 70 myń teńgeden aqshalaı syılyq berildi. Uly Jeńistiń 70 jyldyǵy qarsańynda Qazaqstan Respýblıkasy Prezıdentiniń Jarlyǵymen Uly Otan soǵysyndaǵy erligi, memleketke sińirgen eńbegi men óskeleń urpaqqa patrıottyq tárbıe berýdegi aıryqsha úlesi úshin jetisýlyq 24 ardager memlekettik nagradalarǵa ıe boldy. Naqtylaı tússek, III dárejeli «Barys» ordenimen eki ardager, «Qurmet» ordenimen 10 ardager, «Eren eńbegi úshin» medalimen 8 ardager jáne Qazaqstan Respýblıkasynyń Qurmet gramotasymen 4 ardager marapattaldy.
Jalpy, Almaty oblysynda 343 soǵys ardageri, 20 myńnan astam tyl eńbekkeri bar. Jeńistiń 70 jyldyǵyna oraı oblystyq bıýdjetten barlyq ardagerge 150 myń teńgeden birjolǵy áleýmettik qoldaý kórsetildi. Soǵys ardagerleri men tyl eńbekkerleriniń densaýlyǵyn túzeýge 145 mln. teńge bólindi. Ardagerler qajettiligine qaraı túrli quraldarmen birinshi kezekte qamtylýda. Bul maqsattarǵa 300 mln. teńge qarjy qarastyrylǵan. Baspana kezeginde turǵan 73 soǵys ardagerine páter berildi.
Ardagerlerge qazaqy dástúrmen meıramhanada dastarqan jaıylyp, merekelik konsertpen jalǵasty.
Nurbol ÁLDIBAEV, «Egemen Qazaqstan».
TALDYQORǴAN.
