Foto: Túrkistan oblysynyń ákimdigi
Qala ákimdiginiń habarlaýynsha, 2022 jyly – 520 myń gektardan astam, 2023 jyly – 330 myń gektardan astam, al 2024 jyldyń ózinde 70 myń gektardan astam jer memleketke qaıtarylǵan.
«Bıyl jyl sońyna deıin qosymsha 110 myń gektar jer ýchaskesin memleketke qaıtarý josparlanyp otyr. Búgingi kúnge onyń 60,1 myń gektary qaıtaryldy. Bul jerler kezinde aýyl sharýashylyǵy maqsatynda jeke tulǵalarǵa berilgenimen, jyldar boıy paıdalanylmaǵany anyqtalǵan», delingen habarlamada.
Sonymen qatar oblysta ortaq jaıylymdardy memleketke qaıtarý isi de júıeli júrgizilip jatyr. Bul baǵyttaǵy jumys oblys ákimdiginiń kezekti májilisinde qaralǵan. Joba Memleket basshysy Qasym-Jomart Toqaevtyń 2024 jylǵy 2 qyrkúıektegi Joldaýynda bergen tapsyrmasyna sáıkes iske asyrylyp jatyr. Prezıdent paıdalanylmaı jatqan jerlerdi memleketke alyp, olardy tıimdi paıdalanatyn azamattarǵa berýdi mindettegen bolatyn. Osyǵan oraı aımaqtaǵy jaýapty organdar jerlerdi qaıtaryp, ádil bólýdi jalǵastyryp keledi.
Oblystyq jer qatynastary basqarmasynyń basshysy Erǵalı Tilegenniń aıtýynsha, óńirdiń jalpy jer qory – 11 mln 610,3 myń gektar. Qazirgi kezde paıdalanylmaı jatqan nemese zańǵa qaıshy qoldanylyp otyrǵan aýyl sharýashylyǵy alqaptaryn memleket menshigine qaıtarý úshin oblys ákiminiń ókimimen arnaıy vedomstvoaralyq top qurylǵan.
Jumys eki baǵytta júzege asyrylyp jatyr: birinshisi – Aýyl sharýashylyǵy mınıstrligi bekitken jospar sheńberinde, ekinshisi – jumys toby anyqtaǵan ortaq jaıylymdardy qaıtarý jospary boıynsha.
Jıynda Túrkistan oblysynyń ákimi Nuralhan Kósherov jaıylym jerlerdi qaıtarý jumystaryn kúsheıtýdi tapsyrdy. Ol jaýapty organdarǵa júıeli monıtorıng júrgizip, jyldyq jospardyń tolyq oryndalýyn qadaǵalaýdy mindettedi.
«Memleket basshysy ortaq jaıylymdardy el ıgiligine qaıtarý jóninde naqty tapsyrma berdi. Aýdan, qala ákimderi, jaýapty basqarmalar men departamentter osy baǵyttaǵy jumysty kúsheıtsin. Maqsatsyz paıdalanylyp jatqan jerlerdi qaıtarý isi júıeli júrgizilýi kerek. Kosmomonıtorıng nátıjelerin eskerip, tereń taldaý jasaǵan jón. Monıtorıng, zerdeleý jumystary toqtamaý kerek jáne jyldyq jospardyń tolyq oryndalýy tıis», dedi Nuralhan Kósherov.
Qazirgi tańda Jer resýrstaryn basqarý departamenti 403 jer paıdalanýshyǵa tıesili 124,3 myń gektar jaıylymǵa qatysty qujattardy qarap, nusqamalar jiberip jatyr. Sonymen birge aýdan jáne qala ákimdikteri ázirlegen josparlar aýyldyq okrýg deńgeıinde bekitilip, qaıtarylǵan jaıylym jerlerdiń karta-syzbalary daıyndalǵan.
