Qorǵanys vedomstvosynyń basshysy «Maılın» oqý-jattyǵý polıgonynda bolyp, tank atys qalashyǵyn, oǵan qosa «Ońtústik» áskerı qalashyǵyndaǵy oqý korpýsyn aralady. Mınıstr oqý sabaqtaryn baqylap, jeke quramnyń turmystyq jaǵdaıymen tanysyp, oqý prosesin jetildirý jáne qyzmetti uıymdastyrý jóninde birqatar nusqaýlar berdi. Sonymen qatar, garnızonda ol áskerı tehnıkanyń jaǵdaıyn, oq-dárilerdi saqtaý sharttaryn da tekserdi.
Mınıstr áleýmettik salaǵa erekshe nazar aýdardy. «Mektepke jol» qaıyrymdylyq aksııasy aıasynda ol №4 jalpy bilim beretin orta mektepte bolyp, kóp balaly áskerı qyzmetshiler otbasylarynyń balalaryna mektepke kerek-jaraq zattardy tabys etti.
«Senderdiń ata-analaryń eldiń tynyshtyǵy men qaýipsizdigin qorǵap júr, al sender memlekettiń bolashaǵysyńdar. Bul oqý quraldary senderdiń bolashaqtaryńa tamshydaı úles. Senderge zor densaýlyq, oqýda ozat jáne úlken jetistikter tileımin», dedi Dáýren Qosanov balalarǵa.
Garnızon basshylyǵymen sóılesken mınıstr jaýyngerlik daıyndyqtyń joǵary deńgeıin saqtaýdyń jáne áskerı qyzmetshilerge qamqorlyq jasaýdyń mańyzdylyǵyna nazar aýdardy:
«Áskerı qyzmetshilerdiń ómir súrý jaǵdaıy men áleýmettik-turmystyq máseleleri únemi nazarda bolýy tıis. Tamaqtaný sapasyn, kazarmadaǵy tazalyq pen jaılylyqty, medısınalyq qyzmet kórsetýdi qamtamasyz etýdi qadaǵalaý, sol sekildi áskerı qyzmetshilerdiń otbasylaryn qoldaý sharalaryn kúsheıtý qajet», dep atap ótti ol.
Shyǵys Qazaqstanǵa saparynyń sońynda avıasııa general-leıtenanty Dáýren Qosanov О́skemen garnızonynda bolyp, oblys ákimimen jáne Qarýly kúshter ardagerleri keńesiniń ókilderimen kezdesti. Qorǵanys mınıstri ardagerler jastarmen jıi kezdesip, óz tájirıbelerin berýi kerek ekenin atap ótti.
«Búgingi tańda bizdiń basty mindetterimizdiń biri – jastardy patrıotızm rýhynda, adal jáne tártipti etip tárbıeleý. Senderdiń bilimderiń men dástúrleriń – áskerimizdiń berik negizi», dedi mınıstr.
Sapar qorytyndysyna sáıkes qorǵanys vedomstvosynyń basshysy garnızondar qolbasshylyǵynyń aldyna jaýyngerlik ázirlikti nyǵaıtý, áskerı ınfraqurylymdy jetildirý jáne áskerı qyzmetshiler men olardyń otbasylaryn áleýmettik qoldaý sapasyn arttyrý jóninde naqty mindetter qoıdy.
