Foto: kapital.kz
Qabyldanǵan sheshimderge sáıkes:
- 15 qyrkúıekten bastap Aitu, eGov, eGov Business, eOtinish servısteri men memlekettik aqparattyq júıelerge qol jetkizý úshin nóldik tarıfteý qoldanylady;
- 20 qyrkúıekke deıin Smart Bridge platformasynda bızneske óz IT-sheshimderin memlekettik qyzmettermen esh kedergisiz biriktirýge jaǵdaı jasalady;
- Iri jobalardy iske asyrý maqsatynda Qaztech platformasynda IT-sheshimderdiń qunyna qatysty jáne avtomattandyrylǵan fýnksııalar sanyna qoıylǵan shekteýler alynyp, quqyqtyq aktilerge ózgerister engiziledi;
- Jyl sońyna deıin memlekettik qyzmetterdi jasandy ıntellekt negizinde sıfrlandyrý tapsyryldy.
Aıta keteıik, nóldik tarıfteý tetigi azamattardyń mobıldi balansy nól nemese teris bolǵan kúnniń ózinde de memlekettik resýrstarǵa erkin kirýin qamtamasyz etedi.
«Mundaı qadam Halyqqa qyzmet kórsetý ortalyqtaryna túsetin júktemeni aıtarlyqtaı azaıtýǵa múmkindik beredi jáne digital by default formatyna kóshýdiń mańyzdy kezeńine aınalady. Birqatar shet elderde osyǵan uqsas tetikter qazirdiń ózinde bar. Estonııada X-Road jáne e-Services platformalaryna tegin qoljetimdilik qamtamasyz etilgen, Sıngapýrda telekommýnıkasııa operatorlary SingPass, Gov.sg, MyInfo qyzmetterine nóldik trafık usynady», dep habarlady Úkimettiń baspasóz qyzmeti.
Smart Bridge platformasy arqyly jeke IT-sheshimderdiń memlekettik qyzmetterge ıntegrasııasy ınnovasııalardy engizip qana qoımaı, derbes derekterdi qorǵaý talaptaryn saqtaı otyryp, memleket pen bıznes arasyndaǵy ózara is-qımyldy jańa deńgeıge shyǵarady. Qazirdiń ózinde bul júıe arqyly 14,6 myńnan astam ótinim qabyldanǵan.
Sonymen qatar, Qaztech platformasynda burynǵy shekteýler joıylady. Buǵan deıin ónim ázirleýdiń quny 15 myń AEK-ten aspaýy, merzimi 6 aıdan artyq bolmaýy jáne avtomattandyrylǵan fýnksııalardyń sany úshten aspaýy tıis edi. Endi jańa tásil aýqymdy ári keshendi sheshimderdi jedel iske asyrýǵa múmkindik bermek, bul óz kezeginde otandyq sıfrlyq tehnologııalardyń damýyna jol ashady.
Qazirgi tańda 1 408 memlekettik qyzmettiń 368-i tolyq avtomattandyrylǵan. Taǵy 984 qyzmetti sıfrlandyrý múmkindigi bar, al 56 qyzmet qazirdiń ózinde proaktıvti formatqa kóshirilgen. Jasandy ıntellektini engizý memlekettik qyzmetterdiń sapasyn arttyryp, olardy proaktıvti túrde usynýdy keńeıtýge yqpal etpek.
