Saǵadat Nurmaǵambetov atyndaǵy Qurlyq áskerleriniń áskerı ınstıtýty bıylǵy qabyldaý naýqanyna 590-nan asa úmitker qatyssa, olardyń 350-den astamy oqý ornynyń stýdenti atanǵan.
Aıta keteıik, konkýrstyq irikteý 7 mamandyq pen 16 biliktilik boıynsha ótti. Eń kóp tańdalǵan baǵyttar qatarynda «barlaý bólimshelerin basqarý» jáne «motoatqyshtar bólimshelerin basqarý» boldy.
Qorǵanys mınıstrliginiń habarlaýynsha, radıoelektronıka jáne baılanys áskerı-ınjenerlik ınstıtýtyna 360 talapker qujat tapsyrdy, olardyń ishinde 200-den astamy oqýǵa qabyldanǵan. Bıyldan bastap munda jańa baǵyttar – «áskerı istegi krıptologııa» jáne shyǵys tilderi boıynsha «halyqaralyq áskerı qatynastar jáne aýdarma isi» engizildi. Sabaqtar eki dıplomdyq baǵdarlama boıynsha qazaqstandyq joǵary oqý oryndarymen birlesip júrgiziledi. Konkýrs 7 mamandyq pen 12 biliktilik negizinde ótti. Eń tanymal mamandyq – «aqparatty qorǵaý tehnologııasy jáne uıymdastyrý» boldy.
«Talǵat Bıgeldınov atyndaǵy Áýe qorǵanys kúshteriniń áskerı ınstıtýtyna 600-diń ústinde ótinish kelip tústi, alaıda onyń tek 260-tan astamy ǵana kýrsant atandy. Konkýrstyq irikteý 7 mamandyq jáne 15 biliktilik boıynsha ótti. Áskerı bilim ordasynda oqyǵandar ushqyshtar, ınjener-tehnıkter, teńizshiler jáne áskerı dárigerler mamandyqtaryn alady. Medısınalyq beıindegi mamandardy oqytý Marat Ospanov atyndaǵy Batys Qazaqstan medısınalyq ýnıversıtetiniń bazasynda júzege asyrylatyn bolady. Al teńiz kafedrasynyń kýrsanttary Aqtóbe áskerı joǵary oqý ornynda eki jyl oqyǵannan keıin Shahmardan Esenov atyndaǵy Kaspıı tehnologııalar jáne ınjınırıng ýnıversıtetinde mamandyqty ıgerýdi jalǵastyrady. Bul oqý ornynda «memlekettik avıasııadaǵy áýe kemelerin ushýǵa paıdalaný» jáne «áskerı medısına» mamandyqtary erekshe tanymal», delingen habarlamada.
Al, «Sarbaz 2.0» baǵdarlamasy boıynsha bıyl áskerı ınstıtýttarǵa merzimdi qyzmetin ótep júrgen jáne áskerı boryshyn atqaryp bolǵan 128 azamat qabyldanǵan.
Sonymen qatar UQShU sheńberindegi yntymaqtastyq aıasynda Qyrǵyzstan men Tájikstannan kelgen talapkerler de Almatydaǵy Radıoelektronıka jáne baılanys áskerı-ınjenerlik ınstıtýtynda bilim alady. Olar aldymen jas jaýynger kýrsynan ótip, óz elderinde ant qabyldaǵan soń Qazaqstanǵa oralady.
Áskerı oqý oryndarymen qatar kásibı serjanttardy daıarlaý baǵdarlamasy boıynsha da 900-den astam talapker qabyldandy. Olar elimizdiń bes áskerı kolledjinde bilim alady:
- Saǵadat Nurmaǵambetov atyndaǵy áskerı kolledj (Astana);
- Baýyrjan Momyshuly atyndaǵy áskerı-sport kolledji (Almaty);
- Sabyr Rahymov atyndaǵy áskerı kolledj (Shymkent);
- Talǵat Bıgeldınov atyndaǵy áskerı kolledj (Qaraǵandy);
- Shoqan Ýálıhanov atyndaǵy áskerı kolledj (Aqmola oblysy, Shýchınsk).
Barlyq qabyldanǵan kýrsanttar bir aılyq jas jaýynger kýrsynan ótedi. Oǵan saptyq daıyndyq, atys mashyǵy, dene shynyqtyrý, áskerı jarǵylardy meńgerý jáne praktıkalyq jattyǵýlar kiredi. Kýrstyń sońynda bolashaq sarbazdar áskerı ant qabyldap, kásibı áskerı ómirdiń jańa kezeńin bastaıdy.
