IIM málimetinshe, Jambyl oblysynda 40 jastaǵy jergilikti turǵyn ustaldy. Onyń úıiniń aýlasynan tyıym salynǵan kenep (kannabıs) butalary alyndy. Úı ishinen keptirilmegen jáne keptirilgen marıhýananyń jalpy salmaǵy 240 kelini quraıtyn 144 túbi tárkilendi.
Ulytaý oblysynda er adam ustalyp, odan jalpy salmaǵy 20 keliden asatyn marıhýana men gashısh tárkilendi.
Qaraǵandyda ońtústik óńirlerden jetkiziletin esirtki arnasynyń joly kesildi. Temirjol vokzaly mańynda 75 jastaǵy azamat ustalyp, odan shamamen 10 keli gashısh pen marıhýana alyndy. Sonymen qatar, onyń avtokóligin tekserý kezinde jalpy salmaǵy 20 kelideı eki brıket marıhýana tárkilendi.
«Bıyl 4 655 qylmystyq esirtki quqyqbuzýshylyǵynyń joly kesildi. Zańsyz aınalymnan 11 tonnadan astam esirtki alyndy, onyń ishinde 1 tonnadan astamy sıntetıkalyq zattar. Sıntetıkalyq ónimder daıyndaıtyn 11 narkolaboratorııa joıyldy. 24 tonna hımııalyq zat tárkilendi, onyń ishinde 6 tonnadan astam prekýrsor bar. Esirtki jarnamasyn anyqtaý jumystary kúsheıtildi: anyqtalǵan quqyqbuzýshylyqtar eki esege jýyq ósti, esirtkini jarnamalaǵany úshin 105 sotqa deıingi tergeý isi qozǵaldy. 20 myń ınternet-resýrs — saıttar, akkaýnttar jáne ózge de platformalar buǵattaldy, olar esirtki men psıhotroptyq zattar jaıly aqparat taratqan», dedi QR IIM Esirtki qylmysyna qarsy is-qımyl komıteti tóraǵasynyń orynbasary Qýandyq Áljanov.
