Ishimdikke qarsy arýaq

Osydan úsh jyl buryn Almaty qalasynyń ortalyǵynda ornalasqan emhanaǵa naýqastanyp qalǵan týysymdy ertip keldim. Týysym dárigerdiń qabyldaýyna kirip ketken soń, men tis dárigerine baraıyn dep 4-qabatqa kóterildim. Onda qurylys jumystary júrip jatyr eken. Osy jerde oılamaǵan jerden bir qyzyq oqıǵaǵa tap boldym. Naqtyraq aıtqanda, meni tańǵaldyrǵan ózara áńgimelesip turǵan qurylysshy jigitterdiń adam sengisiz áńgimesi edi. Men kýá bolǵan áńgime bylaı bastaldy. О́zara shúńkildesip turǵan úsh jigittiń biri ekinshisinen: «Keshe túnde saǵan álgi shal keldi me?» – dep surady. Ekinshi jigit túri lezde ózgerip: «Joq, kelgen joq, óıtkeni men túnde araqty aýzyma alǵan joqpyn ǵoı», – dedi. Maǵan bulardyń áńgimesi qyzyq kórindi. О́zgeniń áńgimesine qulaq túrý mádenıetti adamǵa tán qylyq emes ekenin bilsem de, osyndaı oqıǵalarǵa degen qyzyǵýshylyǵym jeńip, burynǵydan da jaqyndańqyrap turdym. Osy kezde júzinen tańdanys pen belgisiz bir qorqynysh taby bilingen úshinshi jigit áńgimege aralasyp: «О́ı, sender bilesińder me, ol túnde meni qamshymen urdy», – dedi. Meni «Apyrmaı, myna jigitter ózderi ne dep tur? Qalanyń qaq ortasyndaǵy emhanada tún ishinde zińgitteı jigitterdi qamshymen sabaıtyn ol ne qylǵan «qutyrǵan shal», – degen oı odan ári qyzyqtyra tústi. Aqyry syrttan qulaq túrgennen góri olarmen jaqynyraq tanysyp, áńgimeleskenim jón bolar dep sheshtim. Jasy 40-45 shamasyndaǵy jigit aǵasy asyqpaı otyryp áńgimesin bastady. «Osy emhanada jóndeý jumystaryn júrgizgenimizge bir aıdan asty. Emhananyń 3-qabatyn bitirip, mine, 4-qabatyna kiristik. Úıimiz qaladan alys bolǵandyqtan, emhana basshylary osyndaǵy bir bólmege túnep jumys isteýge ruqsat etken. Bir kúni qatty sharshaǵan soń azdap syra iship, uıqyǵa kettim. Shyrt uıqyda jatsam, qolynda qamshysy bar aq saqaldy kisi: «Áı, tur» dep qamshysymen eki-úsh ret osyp saldy. Shoshyp oıanyp, jan-jaǵyma qarasam... tym-tyrys, bári uıyqtap jatyr. «E, túsim eken ǵoı», – dep aýnap túsip, uıqyǵa kettim. Ertesine jigitterge túsimdi aıttym. Olar: «Sen ishimdik ishtiń ǵoı, sonyń áseri shyǵar», – dep meni mazaq qyldy. Biraq, arqam birtúrli syzdap, aýyryp turǵan tárizdi. Aýyr jumystan bolar dep mán bermedim. Sol kúni keshke jumys kıimimdi aýystyryp jatqanda, qasymdaǵy turǵan jigit arqamda qyzyl jolaqtar paıda bolǵanyn aıtty. Men oǵan senbeı basqa jumysshylarǵa kórsetip edim, olar da kádimgi bireý shybyqpen nemese qamshymen urǵan tárizdi iz qalǵanyn aıtty. Oılanyp qaldym. Keshke karaı jigitter uıqyǵa ketti. Al meniń múldem uıqym kelmedi. Kózim endi ilinip bara jatyr eken, esik óz-ózinen ashylyp, ishke bireý engendeı boldy. Jel ashqan shyǵar degen oımen uıqyǵa kettim. Ertesine jigitter: «Túnde bir shal kelip, qamshymen sabap ketti», – degendi aıtty. Shynymen-aq, jon arqalarynda dál meniń ústimdegi sııaqty qyzyl jolaqtar qalyp qoıǵan... Biz endi tipti qorqaıyq dedik. Baı­qaýymyzsha, qarııa tek biz ishimdik ishken kúni ǵana elesteıdi eken. Iаǵnı, ol araq ishken adamdardy jaqtyrmaıdy. Osylaı taǵy birneshe kún ótti. Sóıtip júrgende, ártúrli sebeptermen eki qu­rylysshy jumystan shyǵyp, ornyna basqa eki jigit keldi. Qorqytyp almaıyq dep olarǵa «túngi tárbıeshi» týraly esh nárse aıtqan joqpyz. Olar ishimdikke salynbaǵanymen, anda-sanda urttap qoıady eken. Ol eki jigitti de álgi shal qamshymen urypty. Kózimizge kórinbegenimen, onyń bizdiń mańymyzda júretinin sezgen edik. Emhananyń kúzetshisinen surap kórdik. Ol bul týraly eshnárse bilmeıtin bolyp shyqty. Tek egde tartqan tis dárigeri ǵana sondaı bir tylsym kúshtiń bar ekenin aıtty. Ol da bir kúni jumys sońynda azdap sharap iship, uıyqtap ketken eken. Sol kezde biz kórgen qarııa beınesindegi eles ony da qamshymen tartyp-tartyp jibergende shoshyp oıanyp, jan-jaǵyna qarasa, eshkim joq. Tis emdeıtin quraldaryn bireý shashyp ketken. Sodan beri ol dáriger jumys ornynda ishimdik ishpeıtinin aıtty. Bir qyzyǵy, eles tek 4-qabattan ǵana kórinedi. Jumysshylardyń biri ma­ǵan: «Aǵa, senbeseńiz ózińiz qonyp kó­rińizshi», – dedi. «Men issaparǵa baryp kelgen soń qonaıyn», – dep ýáde berdim. Biraq, qolym tımeı, kúndelikti kúıbeń tirshilikpen bul oqıǵa sol kúıi umytylyp bara jatqan. Birde Almatydaǵy «Saıahat» avtovokzalynyń qasynda álgi qurylysshy jigitti kezdeısoq kezdestirip qaldym. Ol da meni birden tanydy. Áńgimelese kele bilgenim, osy oqıǵadan keıin ol ishimdikti múlde qoıǵan. Sodan beri otbasyna bereke kirip, ulyn, qyzyn joǵary oqý ornynda oqytyp jatqanyn, ol ózimen jumystas bolǵan baıaǵy qurylysshy jigitterdiń de araqty qoıyp, barlyǵy turaqty jumys taýyp, jaǵdaılary túzelip ketkenin aıta kele, «Eles-qarııanyń dúresi em boldy», – dep kúlip qoıdy. Al sol emhanadaǵy qandaı tylsym kúsh? Araqtyń azǵyn jolynan Allanyń aq jolyna qaraı baǵyttaǵan Jaratýshynyń jarylqaýynyń biri bolar. Ne dese de, ol – adamdy jaqsylyqqa bastaıtyn kúsh bolsa kerek.