Sýret: gov.kz
«Jastar praktıkasymen»jumysqa ornalasqandardyń kóshin elimizdiń ońtústigindegi óńirler bastap tur. Naqtylasaq, Túrkistan oblysynda – 2,1 myń, Jambylda – 802 adam, Qyzylorda oblysynda – 775, Shymkent qalasynda 665 adam tirkelgen. Al aýyl turǵyndarynyń úlesi – 5 myń adam, paıyzben eseptegende 58,1%-ǵa jetken.
Baǵdarlama sharty týraly az-kem aıta ketsek, múmkindikti 35 jasqa deıingi el azamattary paıdalana alady. Ol úshin úmitkerdiń mamandyǵy boıynsha bilimi bolýǵa tıis. Bul baǵdarlama oqýyn bitirip, jumys tappaı júrgen túlekterdiń óz mamandyǵy boıynsha tájirıbe jııýyna taptyrmas múmkindik. Sebebi eńbek naryǵynda jumys berýshilerdiń tańdaýy kóbine jas mamanǵa emes, óz salasynda ysylǵan, daıyn qyzmetkerge túsedi.
Baǵdarlama arqyly jumysqa ornalasqandardyń arasynda eń kóp suranysqa ıe mamandyq – meıirger. Oǵan 654 adam jumysqa tartylǵan. Sosyn zańger – 367, bastaýysh synyp muǵalimi – 309, tárbıeshi – 292, shet tili muǵalimi – 282 adam. «Jastar praktıkasyna» qatysqan otandastardyń ishinde Kókshetaý qalasynyń turǵyny Bátıma Jasulanova bar.
«Byltyr Kenjeǵalı Saǵadıev atyndaǵy Halyqaralyq bıznes ýnıversıtetin «О́nerkásiptegi halyqaralyq bıznes-logıstıkasy» mamandyǵy boıynsha bitirdim. Az ýaqyt Astanadaǵy bir uıymda jumys istep, qysqartý kezinde jumystan bosap qaldym. «Mansap» ortalyǵyna habarlasyp, jumyssyz retinde tirkeldim. Onda maǵan «Jastar praktıkasyna» qatysýdy usyndy. Qazir Aqmola oblysynyń jolaýshylar kóligi jáne avtomobıl joldary basqarmasynda kólik ınjeneri bolyp jumys isteımin», deıdi Bátıma Jasulanova.
Búginde baǵdarlamanyń múmkindigin paıdalanǵandardyń ortasha jalaqysy respýblıka boıynsha 109,5 myń teńgeni qurapty. «Jastar praktıkasyn» Eńbek mobıldiligi ortalyǵy «Azamattarǵa arnalǵan úkimet» memlekettik korporasııasy arqyly jumysshynyń aı saıynǵy jalaqysyn tóleý arqyly qarjylandyrady. Memleket usynǵan múmkindikti paıdalanyp, eńbek naryǵynda óz jolyn tapqan jastar kóp.
