Izdeý nátıjesin JI qalaı sheshedi?
Bıylǵy jyldyń alǵashqy jartysynda «Google» elimizde «AI Overview» qyzmetin iske qosty. Bul — bedeldi derekkózder negizinde jasandy ıntellekt qurastyratyn avtomatty jaýaptar. Olar izdeý nátıjeleriniń eń joǵary bóliginde ornalasyp, dástúrli siltemeler tizimin jıi almastyrady.
«Ahrefs» zertteýine sáıkes, «AI Overview» paıda bolǵannan keıin saıttarǵa ótý sany ortaeseppen 34,5%-ǵa tómendegen. Sebebi paıdalanýshylar izdegen jaýapty birden alǵan soń, siltemelerdi ashyp áýre bolmaıdy. Tipti izdeý júıesindegi joǵary oryndardyń ózi endi trafıkke kepildik bere almaıdy. Bul bıznes úshin organıkalyq kelýshilerdiń tikeleı azaıýyn bildiredi.
«ZipTie» júrgizgen qosymsha zertteý de osyny rastaıdy: eger saıt «Google»-dyń dástúrli nátıjelerinde birinshi orynda tursa, ol tek 25%-y jaǵdaıda ǵana «AI Overview» derekkózine aınalady. Oryn neǵurlym joǵary bolsa, tańdalý yqtımaldyǵy soǵurlym artqanymen, reıtıngtiń ózi endi absolıýtti kepildik emes.
Sonymen qatar aýdıtorııanyń áreketi ózgerip keledi. Adamdar jaýaptardy braýzerden emes, «ChatGPT», «Perplexity», «Gemini» sııaqty JI-servısterden alatyn boldy. Bıylǵy sáýir aıynda «ChatGPT» saıty álemdegi eń kóp kiretin resýrstardyń TOP-10 qataryna enip, dástúrli medıa jáne izdeý platformalarynan basym tústi.
Qazaqstan da bul úrdisten qalys qalǵan joq. «Netpeak Kazakhstan» derekterine sáıkes, 2025 jyldyń alǵashqy úsh aıynda «ChatGPT» eldegi «Apple» qoldanýshylary arasynda eń kóp júktelgen mobıldi qosymshaǵa aınaldy. Kóptegen adam «Google»-ǵa kirmes buryn, JI-ǵa júginedi — bul tutynýshynyń sheshim qabyldaý jolyn túbegeıli ózgertip jatyr.
Bıznes úshin bul neni bildiredi?
Jasandy ıntellekt tek kilt sózderge ǵana emes, sonymen qatar derekterdiń qurylymy men senimdiligine, paıdalanýshy áreketine, ózara baılanys tarıhy men kontekstine súıenedi. Bıznestiń izdeý nátıjelerindegi ornyn saqtaýy úshin osy faktorlardy eskerip, kontentti generatıvti júıelerdiń algorıtmderine beıimdeý qajet. Bul klassıkalyq SEO-ny joqqa shyǵarmaıdy, biraq ony jańa deńgeıge kóterýdi talap etedi.
Osy beıimdelýdiń bir tıimdi tásili — GEO (Generative Engine Optimization), ıaǵnı generatıvti algorıtmderge ońtaılandyrý. Bul ádistiń máni — saıtty JI senetin senimdi derekkóz retinde qalyptastyrý. Qazaqstanda bul tásil qazirdiń ózinde qoldanylyp júr. Aldymen paıdalanýshy áreketteri men suranys túrleri taldanyp, sodan keıin derekter qurylymdalady. Algorıtm ony daıyn jaýap retinde paıdalana alatyndaı etip kontent daıyndalady. Mundaı ádisti qoldanǵan kompanııalardyń alǵashqy aptanyń ózinde-aq JI jaýaptaryna shyqqan mysaldary bar. Bul jańa formatqa beıimdelý onlaın-kórinimdilikti saqtap qalýǵa múmkindik beretinin dáleldeıdi.
Kóptegen sarapshy aldaǵy jyldary dástúrli izdeý júıelerinen keletin trafıktiń kólemi azaıa beredi dep esepteıdi. Sondyqtan buǵan daıyndyq tek tehnıkalyq emes, strategııalyq qadam bolýǵa tıis. Kim tez beıimdelse, sol tutynýshy nazarynda qalady.
Baýyrjan TOQTAǴAZY,
marketıng salasynyń sarapshysy, «Netpeak Kazakhstan» agenttiginiń bas dırektory
